Chungu kifukapo moshi

CHUNGU KIFUKAPO MOSHI, VIPIKWAVYO VYAUNGUA

Ninaleta fikirishi, watunzi kulitengua
Zimezidi kashikashi, si zile nilichagua
Uzombi ninaoishi, kifuani naugua
Chungu kifukapo Moshi, Vipikwavyo vyaungua

Chungu Moshi kifukapo, vyaungulia vipikwa
Leo nikipiga Kopo, kesho rumande naswekwa
Yanilemea mikopo, ufukara nimevikwa
Chungu kifukapo Moshi, Vipikwavyo vyaungua

Zina misumali Ndala, nizidishe kuzivaa
Japo sina pa kulala, mapema nitoke baa
Kichelewapo Chakula, nisiseme nina njaa
Chungu kifukapo Moshi, Vipikwavyo vyaungua

Japo naumwa sauti, nizidishe mapambio
Kila nikivaa koti, lifunike masikio
Zikinitoroka noti, nicheke paso kilio
Chungu kifukapo Moshi, Vipikwavyo vyaungua

Nitazamapo kioo, bongebonge nimuone
Ingawa sipati choo, niseme mimi mnene
Tena nikikabwa koo, tabasamu lijazane
Chungu kifukapo Moshi, Vipikwavyo vyaungua

Nitishiwapo risasi, nijivike kunyamaa
Nihisipo ni kisasi, niseme ni ujamaa
Na amsemaye Bosi, nimuone ni kichaa
Chungu kifukapo Moshi, Vipikwavyo vyaungua

Tafsiri ya amani, iwe kujifanya bubu
Vyeti vyangu kabatini,visinipe majawabu
Uchumi ukiwa chini, niwalaumu mababu
Chungu kifukapo Moshi, Vipikwavyo vyaungua

Kifukapo Moshi Chungu, vipikwa vyaungulia
Alichochagua Mungu, si haki kukililia
Yakinizidi machungu, nje naweza kimbilia
Chungu kifukapo Moshi, Vipikwavyo vyaungua

malenga wa Ngumbalu
Grupo público Kisima Cha Mashairi | Facebook