Jeshi la Polisi Mkoa wa Dodoma linaendelea na uchunguzi wa mauaji ya Lea Eliud Mazengo (50), mkazi wa Kijiji cha Lamaiti, Wilaya ya Bahi, ambaye alikutwa amefariki dunia akiwa shambani baada ya kuripotiwa kupotea.
Kwa mujibu wa taarifa za familia, marehemu aliondoka nyumbani Julai 20, 2026 kuelekea shambani kwa ajili ya kuvuna alizeti, lakini hakurejea. Ndugu na watoto wake walianza msako na baadaye waligundua mwili wake ukiwa umefichwa chini ya magunia ya alizeti yaliyokuwa shambani.
Akizungumzia tukio hilo, Kamanda wa Polisi Mkoa wa Dodoma, ACP Gallus Hyera, amesema uchunguzi wa awali unaonesha kuwa marehemu aliuawa kwa kukabwa shingoni na aliyekuwa mume wake, huku chanzo kinachodaiwa kuhusishwa na tukio hilo kikiwa ni wivu wa kimapenzi.
Mmoja wa wanafamilia amesema kabla ya tukio hilo, marehemu na mume wake walikuwa na migogoro ya kifamilia, ikiwamo masuala ya chakula. Amesema hali hiyo ilifikia hatua ambapo marehemu alifukuzwa katika chumba walichokuwa wakilala na kuanza kulala sebuleni.
Kamanda Hyera amesema uchunguzi bado unaendelea ili kubaini mazingira yote ya tukio hilo, huku viongozi wa kijiji wakieleza kuwa marehemu alikuwa kiongozi wa serikali ya kijiji na mtu aliyekuwa akiheshimika katika jamii.