Mkuu wa Mkoa wa Mbeya, Jumanne Sagini, ametoa ufafanuzi kuhusu vurugu zilizojitokeza kwa baadhi ya waendesha bajaji mkoani humo kukaidi maagizo ya Serikali na kuamua kujichukulia sheria mkononi kwa kuanzisha vurugu.
Akizungumza katika TBC Aridhio leo Oktoba 20, 2026, Sagini amesema mnamo Oktoba 12 mwaka huu, Uongozi wa Mkoa huo uliketi kikao cha pamoja na madereva wa daladala, bajaji, bodaboda pamoja na wadau wengine wa usafiri kwa ajili ya kuwapanga katika maeneo maalumu ili kupunguza msongamano katikati ya barabara kuu ya TANZAM.
Amesema baada ya maamuzi hayo, wapo madereva walioonyesha kutoridhishwa na maamuzi hayo hali iliyopelekea kuamua kujichukulia sheria mkononi kwa kuwashambulia madereva wa bajaji ambao walifuata maagizo yaliyotolewa.
Hata hivyo, Sagini amesema Jeshi la Polisi mkoani humo limeimarisha ulinzi katika maeneo yaliyokuwa na vurugu ambapo kumekuwa na hali ya usalama hadi sasa huku akisisitiza yupo tayari kuwasikiliza madereva hao wenye malalamiko kwa kufuata utaratibu. Chanzo : Tbc Digital