Mkuu wa wilaya ya Korogwe, Mrisho Gambo amefikishwa katika Mahakama ya Hakimu Mkazi wilaya ya Korogwe jana kwa shtaka la kumkashifu Mwanasheria wa Halmashauri ya Mji Korogwe kuwa ana stashahada ya chupi. Katika kesi hiyo, Hakimu alikataa Mwanasheria Mkuu wa Serikali kumwakilisha Mkuu huyo wa wilaya katika kesi ya madai ya Shilingi Milioni 96 dhidi yake.
Katika kesi hiyo Na. 7/ 2012 mlalamikaji ni Mwanasheria wa Halmashauri ya Mji Korogwe, Najum Tekka anayedai kukashifiwa na Gambo wakati wa kikao cha Kamati ya Ulinzi na Usalama wilaya kwamba stashahada ya Sheria aliyopata mtumishi huyo ni ya chupi.
Awali ilidaiwa kwamba mkuu huyo wa wilaya alimwalika mlalamikaji kutoa ushauri wa kisheria kuhusu namna ya kumaliza mgogoro baina ya halmashauri ya mji na wafanyabiashara na kwamba baada ya kufanya hivyo mlalamikiwa alipinga ushauri uliotolewa na kisha kutoa kauli hiyo kwamba shahada yake ni ya chupi.
Mbele ya Hakimu Mkazi wa mahakama hiyo Hamis Salum, mlalamikaji huyo aliiomba mahakama imwondoe Mwanasheria Mkuu wa Serikali ambaye aliwakilishwa Mahakamani hapo na Wakili wa Serikali, Rebecca Msalangi kwa kuwa hana mamlaka katika madai hayo na kamwe Ofisi yake haikuwahi kupeleka ombi maalum la kutaka kumwakilisha Gambo kwenye shauri hilo.