Kisa Kipya cha Sungura, Alitoka Siku Moja

Hiki kisa kinakuja, Ukae chini tulia,
Ni cha Sungura mmoja, hapa nawasimulia,
Ilikuwa siku moja, njaa imemshikia,
Njaa imemshikia, Sungura nawaambia!

Ni Sungura yule yule, aliyezizira ndizi!
Ni yule wa mwaka ule, aliyeleta mapozi,
Tuliyemsoma shule, miaka ile ya enzi,
Miaka ile ya enzi, Sungura nawaambia!

Karudi kakasirika, huku tumbo languruma,
Tumbo lake kalishika, huku meno kayauma,
Jasho linamdondoka, huku anahema hema,
Huku anahema hema, Sungura nawaambia!

Sungura akaondoka, kusaka matunda yale,
Akaondoka na shoka, na mkuki na mishale,
Akawaomba mahoka, na akachanjwa na chale,
Na akachanjwa na chale, Sungura nawaambia

Sungura alitafuta, na kutafuta mitini,
Akatafutafuta, msituni mashambani,
Na mwisho akayapata, matunda alotamani,
Matunda alotamani, Sungura nawaambia.

Akayaona mtini, hakuuliza ya nani,
Yameiva kama nini, kajiambia moyoni,
Tunda hili tunda gani, hakuuliza kichwani,
Hakuuliza kichwani, Sungura Nawaambia!

Karuka tena karuka, mwishowe kayafikia,
Ishirini kayashika, Sungura kashangilia,
Tabasamu likatoka, kacheka hata mkia!
Kacheka hata mkia, Sungura nawaambia!

Katafuna kwa haraka, na kumeza pole pole,
Akayala akicheka, akilamba na vidole,
Na njaa ikamtoka, tumbo limejaa tele,
Tumbo limejaa tele, Sungura nawaambia!

Mwishowe akasinzia, na ndoto ikamjia,
Mbali akakumbukia, ndizi alizoachia,
Bahati kajipatia, matunda amejilia,
Matunda amejilia Sungura nawaambia!

Mara kaanza kulia, na ndoto ikapotea,
Tumbo ameshikilia, hakuna cha kuchekea,
Maumivu asikia, huku anachechemea,
Huku anachechemea, Sungura nawaambia!

Kakimbia kijijini, huku analia lia,
Kagaragara na chini, jamani anaumia,
Kaulizwa shida nini, kisa kawasimulia,
Kisa kawasimulia, Sungura nawaambia!

Kaulizwa tunda gani, alilokula jamani,
Akasema mti gani, mapovu yako kinywani,
Kumbe ya sumu watani, yamtokea puani,
Yamtokea puani, Sungura nawaambia!

Akasema nimekoma, nisaidieni jamani,
Nimekoma vya kukoma, mengine sitotamani,
Sasa nimepata homa, hainitoki mwilini,
Hainitoki mwilini, Sungura nawaambia!

Akapoteza fahamu, mauti yako njiani,
Kumbe kali ile sumu, hakuna dawa porini,
Masikini marehemu, yamemkuta jamani,
Yamemkuta jamani, Sungura nawaambia!

Kaditamati natama, beti zangu zimegoma,
Ya Sungura nimesema, ya tamaa isokoma,
Tamaa ina gharama, yaweza toa uzima,
Yaweza toa uzima, Sungura nawaambia!

Na. M. M. Mwanakiiji (Sauti ya Kijiji)

Ukawa.chadema....

The Boss said:

Ukawa.chadema....

Click to expand...

Jamani siasa imewaingia mno.. duh!!

Fumbo mfumbue mjinga mwerevu ang'amua S3 siyo tunda la sumu,ndio muarubaini wa kero za muungano.S2 ndizi tulozoea, imedumaza makuzi, haina virutubisho muhimu. Jamani nyakati zatupita.

The Boss said:

Ukawa.chadema....

Click to expand...

Mkuu The Boss, afadhali yako japo umeona mwanga, sie wengine ni giza tupu!, tumeishia kusoma vina tuu!, tumetoka kapa kabisa!.
Pasco

The Boss said:

Ukawa.chadema....

Click to expand...

Kwani hawa watakua wameshakula matunda yetu??? Mm nahisi kaongelewa Chukua Chako Mapema hapo!!

Watanzania mmehariniwa nyinyi mwisho hata sala ya Baba Yetu mtadhani ni ya kisiasa!

dah nilikuwa nataka kuchangia hao wa juu wameshanikata utamu

Sungura haeleweki.

Malenga wetu Mzee Mwanakijiji, nakusalimia mzee wetu. Kama hadhira yenye ukosefu wa elimu ya kutosha nimeshindwa kung'amua ujumbe kusudiwa ktk shairi lako. Kama hutojali naomba uliweke shairi lako ktk maelezo mafupi ya kawaida ili nami, Mtanzania wa kawaida toka shule za kata, niweze kujifunza. Natanguliza shukurani.

Mrs Kharusy said:

Kwani hawa watakua wameshakula matunda yetu??? Mm nahisi kaongelewa Chukua Chako Mapema hapo!!

Click to expand...

posho......

unataka kunambia sungura hana bahati kwa kukosa kuyala matunda enzi zile na unasema hata akipata matunda 20 atakufa kwa mana atayala kwa pupa bila kuwa makini nakukubali malenga wangu malengawangu

Skype said:

Malenga wetu Mzee Mwanakijiji, nakusalimia mzee wetu. Kama hadhira yenye ukosefu wa elimu ya kutosha nimeshindwa kung'amua ujumbe kusudiwa ktk shairi lako. Kama hutojali naomba uliweke shairi lako ktk maelezo mafupi ya kawaida ili nami, Mtanzania wa kawaida toka shule za kata, niweze kujifunza. Natanguliza shukurani.

Click to expand...

Uzuri wa kazi kama hii ni wewe kama msomaji kufikiria maana yake kwa undani wake na inakuwa huru kutafsiriwa tofauti tofauti.. sungura ni nani? matunda ni nini? na kwanini?

Mzee Mwanakijiji said:

Uzuri wa kazi kama hii ni wewe kama msomaji kufikiria maana yake kwa undani wake na inakuwa huru kutafsiriwa tofauti tofauti.. sungura ni nani? matunda ni nini? na kwanini?

Click to expand...

malenga wangu watu wanaotafsiri nyimbo enzi zile walisababisha kufungiwa nyimbo ya tx mpenz (dereva wangu tulia) mana watu walitafsiri kwa mtindo hasi mpaka wakaifungia

Mzee Mwanakijiji said:

Uzuri wa kazi kama hii ni wewe kama msomaji kufikiria maana yake kwa undani wake na inakuwa huru kutafsiriwa tofauti tofauti.. sungura ni nani? matunda ni nini? na kwanini?

Click to expand...

Sawa mkuu lakini kwa kizazi cha leo ni wachache sana wataweza kutafsiri kazi kama hizi, je, ujumbe utawafikiaje?

Sungura kafaa???
Sasa tutapata wapi shairi lingine la sungura ndizi mtini

The navi 2 said:

Sungura kafaa???
Sasa tutapata wapi shairi lingine la sungura ndizi mtini

Click to expand...

wataibuka sungura wengine mapambano lazima yaendeleee

Skype said:

Malenga wetu Mzee Mwanakijiji, nakusalimia mzee wetu. Kama hadhira yenye ukosefu wa elimu ya kutosha nimeshindwa kung'amua ujumbe kusudiwa ktk shairi lako. Kama hutojali naomba uliweke shairi lako ktk maelezo mafupi ya kawaida ili nami, Mtanzania wa kawaida toka shule za kata, niweze kujifunza. Natanguliza shukurani.

Click to expand...

Hivyo ilivyo inanoga zaidi.

The navi 2 said:

Sungura kafaa???
Sasa tutapata wapi shairi lingine la sungura ndizi mtini

Click to expand...

"Kumbe wala hakufa, Sungura alizimia,
Labda ni kifafa, tabibu atatuambia,
Matunda si ya maafa, tusubiri watanzania,
Tusubiri watanzania, stori itaendelea"

du nafuu sungura yu hai....:hail: