Mwenyekiti wa CHADEMA Wilaya ya Mwanga mkoani Kilimanjaro, Lembrus Mchome, amewataka wanachama na wanaharakati wa chama hicho kuacha matusi na mashambulizi dhidi ya viongozi, akisema hatua hizo zinakidhoofisha chama.
Mchome amesema amesikitishwa na mashambulizi yanayoendelea mitandaoni dhidi ya baadhi ya viongozi wa CHADEMA, akiwataka wanaharakati walioko ndani na nje ya nchi kutambua kuwa siasa hazipaswi kujengwa katika uadui, hasa wakati wa misiba.
Amesema anapongeza hatua ya Mwenyekiti wa CHADEMA Taifa, Tundu Lissu, kutoa pole kwa Rais Samia Suluhu Hassan kufuatia kifo cha mume wake, akisisitiza kuwa msiba si jambo la kusherehekea wala kufurahia.
Aidha, Mchome amemtuhumu Makamu Mwenyekiti wa CHADEMA, John Heche, kuwa na uhusiano usioeleweka na baadhi ya viongozi wa Serikali, akidai namna alivyopata pasipoti yake kupitia mawasiliano na Mkurugenzi wa Usalama wa Taifa inapaswa kuibua maswali ndani ya chama.
Mchome amewataka wanaharakati kutazama kwa umakini suala hilo na kuacha kumshambulia Godbless Lema, akisema mjadala unaopaswa kujikita zaidi ni tuhuma dhidi ya Heche na namna zinavyoweza kuathiri umoja na mustakabali wa CHADEMA.
View attachment 3669706