SI KWELI Messi na Ronaldo wamekutana na kucheza pamoja kama video hii

Uchambuzi wa video kupitia nyenzo za kubaini maudhui yaliyotengenezwa kwa Akili Unde unabainisha kuwa sauti na picha zote zina alama za kidijitali (digital watermarks) ambazo hutumiwa na Google kutambua maudhui yaliyotengenezwa au kubadilishwa kwa kutumia AI.

Kadhalika zipo hitilafu au mapungufu ya kimuonekano ambapo ukiangalia kwa makini mandhari ya nyuma na nyuso za watu waliopo, utaona “glitches” na mienendo isiyo ya kawaida ambayo ni ya kawaida katika video za AI. Kwa mfano, kamera inaposogea, uwiano wa wachezaji na watu wanaowazunguka hubadilika kidogo kwa namna ambayo haiwezi kutokea katika hali halisi.

Hata hivyo hakuna kumbukumbu yoyote inayoonesha kuwa Lionel Messi na Cristiano Ronaldo waliwahi kukutana katika mazingira kama haya. Kutokana na hadhi yao, tukio kama hili lingekuwa habari kubwa duniani na kuripotiwa na vyombo vikuu vya michezo ambapo kupitia utafutaji wa maneno muhimu (Key words search) imebainika kuwa hakuna chanzo chochote cha kuaminika kilichoripoti kuhusu tukio hilo.

Video hii inayoonekana kuwa halisi sana inaendelea kuwa ya kawaida kama njia ya kuunda matukio ya kubuni kwa ajili ya burudani, lakini katika kesi hii, mkutano wa kihistoria kati ya mastaa hawa wawili haujawahi kutokea katika uwanja huu.​