Nairobi yawaka kwa 'Baba' - Wakenya wakusanyika uhuru park kumkumbuka Raila Odinga

Nairobi imekuwa kitovu cha kumbukumbu za aliyekuwa Waziri Mkuu wa Kenya, Raila Odinga, huku Wakenya wakikusanyika katika Bustani ya Uhuru Park kuanza rasmi shughuli za kumuenzi mwaka mmoja baada ya kifo chake.

Mamia ya watu wamefika Uhuru Park wakiwa na mishumaa, maua na picha za Raila kwa ajili ya hafla ya kuwasha mishumaa inayofanyika leo, Oktoba 2. Shughuli hiyo ni sehemu ya mpango wa mwezi mzima wa “Mwezi wa Baba” unaoandaliwa kwa ajili ya kumkumbuka Raila na mchango wake katika maisha ya kisiasa na kijamii nchini.

Lakini si Uhuru Park pekee ambapo kumbukumbu hiyo inaonekana. Kuanzia saa moja usiku, historia na simulizi ya maisha ya Raila imekuwa ikionyeshwa kwenye jengo la Kenyatta International Convention Centre (KICC) katikati ya Nairobi, na kulifanya jengo hilo kuwa sehemu nyingine kubwa ya kumbukumbu za leo.


Raila alifariki Oktoba 15, 2025, akiwa nchini India, akiwa na umri wa miaka 80. Kwa hivyo, shughuli za leo zinaashiria kuanza kwa mwezi wa kumbukumbu unaotarajiwa kufikia kilele chake Oktoba 15, siku inayotimiza mwaka mmoja tangu kifo chake.

Chama cha ODM, ambacho Hayati Raila Odinga ni mwasisi wake, kimeandaa shughuli mbalimbali katika maeneo tofauti ya nchi, huku familia ya Raila ikiwa pia na mpango wake wa kumbukumbu unaotarajiwa kufanyika nyumbani kwake Bondo baadaye mwezi huu.

Kutoka Uhuru Park hadi KICC, Nairobi leo imegeuka kuwa ukumbi mkubwa wa kumkumbuka Mwanasiasa ambaye kwa miongo kadhaa alikuwa sehemu muhimu ya historia ya kisiasa ya Kenya.

Lakini swali linalobaki ni: mwaka mmoja baada ya kuondoka kwake, ni sehemu gani ya urithi wa Raila Odinga ambayo Wakenya wataendelea kuibeba?

Bongo wangesambaratishwa kwa sababu nchi inaongozwa kwa decree