Herbalist Dr MziziMkavu
JF-Expert Member
- Feb 3, 2009
- 42,872
- 34,363
Diego Garcia, kisiwa kilicho mbali katika Bahari ya Hindi, ni peponi kwa mimea na fukwe zenye mchanga mweupe, kwenye maji ya buluu.
Lakini kisiwa hiki sio kivutio cha watalii. Ni kituo cha kambi ya siri ya kijeshi ya Uingereza na Marekani - kisiwa kilichogubikwa na uvumi na siri kwa miongo kadhaa.
Kisiwa hicho, kipo chini ya himaya ya Uingereza, na ni kitovu cha mzozo wa muda mrefu kati ya Uingereza na Mauritius, na mazungumzo yameongezeka katika wiki za hivi karibuni.
BBC ilipata fursa ya kufika katika kisiwa hicho mapema mwezi huu. Tulitaka kufuatilia kesi ya kihistoria iliyo mahakamani kuhusu matendo dhidi ya Watamil wa Sri Lanka, watu wa kwanza kuomba hifadhi katika kisiwa hicho, na wamekwama huko kwa miaka mitatu.
Mapigano magumu ya kisheria yanaendelea kuhusu hatima yao na hukumu itaamua hivi karibuni ikiwa wamezuiliwa kinyume cha sheria.
Diego Garcia, kisiwa hiki kiko umbali maili 1,000 (kilomita 1,600) kutoka ardhini iliyo karibu zaidi, kiko kwenye orodha ya visiwa vilivyo mbali zaidi ulimwenguni.
Hakuna safari za ndege za kibiashara kufika huko na kufika kwa njia ya bahari si rahisi - vibali hutolewa kwa boti za visiwa vya karibu tu na kuruhusu kupita kwa usalama katika Bahari ya Hindi.
Ili kuingia kisiwa hicho unahitaji kibali, kinachotolewa kwa watu walio na uhusiano na kituo cha kijeshi au mamlaka ya Uingereza inayoendesha eneo hilo. Waandishi wa habari wamezuiliwa kwa muda mrefu kufika.
Mawakili wa serikali ya Uingereza walileta changamoto ya kisheria kujaribu kuizuia BBC kuhudhuria kesi hiyo, na hata ruhusa ilipotolewa kufuatia uamuzi wa Mahakama ya Juu ya eneo hilo, Marekani baadaye ilipinga, ikisema haitatoa chakula, usafiri au malazi kwa wote wanaojaribu kufika kisiwani kwa ajili ya kesi hiyo - ikiwa ni pamoja na hakimu na mawakili.
Mazungumzo ya serikali hizo mbili, yalioonekana na BBC, yanaeleza kuwa nchi zote mbili, zina wasiwasi juu ya kukubali vyombo vya habari kwenda Diego Garcia.
Hatimaye ruhusa ilipotolewa kwa mimi kukaa kwa siku tano kwenye kisiwa hicho, ilikuja na vizuizi vikali hadi juu ya mienendo yangu kisiwani na hata kupiga marufuku kuripoti vikwazo vilivyowekwa.
ilitaka Diego Garcia ili kuripoti kesi inayoendelea kuhusu wahamiaji wa Sri Lanka waliozuiliwa huko.
Wafanyikazi wa kampuni ya ulinzi ya G4S walisafirishwa hadi eneo hilo ili kutoa ulinzi kwa timu ya BBC na mawakili ambao walikwenda kwa ajili ya kusikiliza kesi hiyo.
Lakini licha ya vikwazo, bado niliweza kutazama maelezo, ambayo yote yalisaidia kuchora picha ya mojawapo ya maeneo yenye vikwazo zaidi duniani.
Diego Garcia ni mojawapo ya visiwa 60 vinavyounda Visiwa vya Chagos au Eneo la Bahari ya Hindi la Uingereza (Biot) - koloni la mwisho lililoanzishwa na Uingereza kwa kuitenganisha na Mauritius mwaka 1965. Kiko nusu, kati ya Afrika Mashariki na Indonesia.
Kambi ya kijeshi ya Uingereza na Marekani imekuwa hapo tangu mwanzoni mwa miaka ya 1970.
Makubaliano yaliyotiwa saini 1966 - yaliikodisha Marekani kisiwa hicho kwa miaka 50, na uwezekano wa kuongezwa kwa miaka 20 zaidi. Mkataba unatarajiwa kuisha 2036.
Katika kisiwa chenyewe, ninaona magari ya polisi wa Uingereza. Dola ya Marekani ndiyo sarafu inayokubalika na soketi za umeme ni za Marekani. Ingawa eneo linasimamiwa kutoka London, wafanyakazi wengi na rasilimali ziko chini ya udhibiti wa Marekani.
Kaimu kamishna wa Biot amesema kuwa haiwezekani kwake "kuilazimisha mamlaka ya Marekani" kuruhusu tufike sehemu yoyote ya kituo cha kijeshi kilichojengwa na Marekani chini ya masharti ya makubaliano ya Uingereza na Marekani, licha ya kuwa eneo ni la Uingereza.
Katika miaka ya hivi karibuni, eneo hilo limekuwa likigharimu Uingereza mamilioni ya pauni, na sehemu kubwa ya gharama hizo ni kutokana na ‘wahamiaji hao."
Hali ya anga katika kisiwa hicho ni tulivu. Wanajeshi na wakandarasi wanaendesha baiskeli, watu wengine wanacheza tenisi na kufurahia upepo kwenye jua la alasiri.
Wakati wote, maafisa wa kijeshi wa Marekani na Uingereza wanafuatilia kwa karibu mienendo ya wageni waliofika.
Kisiwa hiki kina uzuri wa asili wa kushangaza, kutoka mimea yenye majani hadi fukwe nyeupe safi. Wanajeshi wanaonya juu ya hatari ya papa katika maji yanayozunguka.
Historia ya Ukoloni
Maelezo ya picha,Picha ya kumbukumbu ya 1960 - mwenyeji wa kisiwa cha Chagos akifua nazi
Uingereza ilipochukua udhibiti wa Visiwa vya Chagos - Diego Garcia - kutoka koloni la zamani la Uingereza, Mauritius, iliwaondoa wakazi wake zaidi ya watu 1,000 ili kutoa nafasi kwa kituo cha kijeshi.
Watu waliokuwa watumwa waliletwa katika Visiwa vya Chagos kutoka Madagaska na Msumbiji kufanya kazi kwenye mashamba ya minazi chini ya utawala wa Ufaransa na Uingereza. Katika karne zilizofuata, waliibuka na lugha yao wenyewe, muziki na utamaduni wao.
Kwa Uingereza, kisiwa hiki kinatoa nafasi ya kudumisha uhusiano wa karibu wa kijeshi na Marekani, lakini pia kulikuwa na motisha ya kifedha.
Marekani ilikubali punguzo la dola milioni 14 katika ununuzi wa Uingereza wa makombora yake ya nyuklia ya Polaris kama sehemu ya makubaliano ya siri kuhusu visiwa hivyo.
Mwaka 1967, kufukuzwa kwa wakaazi wote kutoka visiwa vya Chagos kulianza. Mbwa na paka walikusanywa na kuuawa. Wakaazi waliingizwa kwenye meli za mizigo na kupelekwa Mauritius au Seychelles.
Uingereza ilitoa uraia kwa baadhi ya jamii hiyo ya Wachagossia mwaka 2002, na wengi wao walikwenda kuishi Uingereza.
Mauritius, ambayo ilipata uhuru kutoka kwa Uingereza mwaka 1968, inashikilia kuwa visiwa hivyo ni vyake na mahakama ya juu zaidi ya Umoja wa Mataifa imeamua, kwamba utawala wa Uingereza wa eneo hilo ni "kinyume cha sheria" na lazima ukomeshwe.
Ilisema Visiwa vya Chagos vinapaswa kukabidhiwa kwa Mauritius ili kukamilisha "kuondoka kwa ukoloni" wa Uingereza.
Kunafanyika shughuli gani?
Maelezo ya picha, Mshambuliaji wa Jeshi la Wanaanga la Marekani liliruka kutoka kwa Diego Garcia, kuelekea Afghanistan, Oktoba 2001
Matthew Savill, mkurugenzi wa sayansi ya kijeshi katika taasisi ya ulinzi ya Uingereza, Rusi, anasema Diego Garcia ni eneo "muhimu sana", "kwa sababu ya nafasi yake katika Bahari ya Hindi na vifaa vilivyo nayo: bandari, hifadhi na uwanja wa ndege".
Kisiwa hicho pia ni eneo muhimu kwa "uwezo wa ufuatiliaji na uchunguzi. Meli zinazofanya kazi Diego Garcia zilijaza mafuta kwa ndege za kivita za Marekani aina ya B-2 zilizokuwa zimesafirishwa kutoka Marekani kufanya mashambulizi ya kwanza ya anga dhidi ya Afghanistan baada ya mashambulizi ya 9/11.
Na wakati wa "vita dhidi ya ugaidi," ndege pia zilitumwa moja kwa moja kutoka kisiwa chenyewe kwenda Afghanistan na Iraq.
Kambi hiyo pia ni mojawapo ya "idadi ndogo sana ya maeneo duniani kupakia tena nyambizi" zenye silaha kama makombora ya Tomahawk na Marekani imeweka kiasi kikubwa cha silaha kwa ajili ya dharura.
Wakati nikiwa kisiwani, natakiwa kuvaa pasi nyekundu ya mgeni na ninafuatiliwa kwa karibu kila wakati. Malazi yangu yanalindwa saa 24 kwa siku na wanaume walio nje huandika wakati ninapoondoka na kurudi - kila mara kwa kusindikizwa.
Katikati ya miaka ya 1980, mwandishi wa habari wa Uingereza Simon Winchester alijifanya mashua yake imepata matatizo karibu na kisiwa hicho. Alikaa kwenye ghuba hiyo kwa takriban siku mbili, na aliweza kukanyaga ufuo kwa muda mfupi kabla ya kusindikizwa na kuambiwa: “Nenda zako na usirudi tena.”
Zaidi ya miongo miwili baadaye, mwandishi wa habari wa gazeti la Time alitumia dakika 90 au zaidi kwenye kisiwa hicho wakati ndege ya rais wa Marekani iliposimama hapo kujaza mafuta.
Uvumi umeenea kwa muda mrefu kuhusu matumizi ya Diego Garcia, ikiwa ni pamoja na kwamba imekuwa ikitumika kama eneo la CIA - kituo kinachotumiwa kuwaweka na kuwahoji washukiwa wa ugaidi.
Serikali ya Uingereza ilithibitisha mwaka 2008 kwamba ndege za awali zilizowabeba washukiwa wa ugaidi zilitua kisiwani humo mwaka 2002.
‘Kisha mmoja alihamishiwa Guantanamo, na mwingine akarudishwa katika nchi yake, hakuna zaidi, "alisema Mkurugenzi wa zamani wa CIA, Michael Hayden.
Miaka kadhaa baadaye, Lawrence Wilkerson, mkuu wa wafanyakazi wa Waziri wa zamani wa Mambo ya Nje wa Marekani Colin Powell, aliiambia Makamu wa Habari kwamba vyanzo vya kijasusi vilimwambia Diego Garcia ilitumiwa kama sehemu "ambapo watu waliwekwa kwa muda na kuhojiwa mara kwa mara.”
Sikuruhusiwa kwenda na eneo lolote nyeti la kijeshi la Diego Garcia. Baada ya kuondoka katika kisiwa nilipokea barua pepe, ikinishukuru kwa kukaa kwangu na kuniomba maoni. Na kabla kuondoka pasipoti yangu iligongwa muhuri wa nembo ya eneo hilo. chanzo.BBC
