The Sheriff
JF-Expert Member
- Oct 10, 2019
- 747
- 2,112
John Amos, aliyekuwa nyota wa filamu nchini Marekani amefariki dunia akiwa na umri wa miaka 84.
Amos ameaga dunia tarehe 21 Agosti huko Los Angeles. Msemaji wa Amos, Belinda Foster, amethibitisha habari za kifo chake jana Jumanne, Oktoba 1, 2024.
John Amos alikuwa mwigizaji maarufu wa Kimarekani aliyefahamika zaidi kwa uigizaji wake kama James Evans Sr. kwenye kipindi cha runinga cha "Good Times" kilichokuwa maarufu katika miaka ya 1970. Pia alijulikana kwa jukumu lake la Kunta Kinte katika tamthilia ya kihistoria "Roots" ya mwaka 1977, ambapo alipata uteuzi wa Tuzo ya Emmy kutokana na uigizaji wake.
Amos alizaliwa tarehe 27 Desemba 1939 huko Newark, New Jersey, na kabla ya kuwa mwigizaji, aliwahi kuwa mfanyakazi wa kijamii na pia alicheza soka kwa muda mfupi katika ligi ndogo.
Mbali na "Good Times" na "Roots," Amos alionekana kwenye filamu kama "Coming to America" na vipindi vingi vya televisheni, ikiwa ni pamoja na "The West Wing" na "The Mary Tyler Moore Show." Alifariki tarehe 21 Agosti 2024 akiwa na umri wa miaka 84, baada ya maisha marefu na yenye mafanikio katika tasnia ya burudani.
Filamu ya Coming to America
Wapenzi wa filamu ya Coming to America (1988), John Amos aliigiza kama Cleo McDowell, mmiliki wa mgahawa unaoitwa "McDowell's," ambao ni mgahawa unaofanana sana na McDonald's, lakini ana msisitizo kwamba mgahawa wake ni tofauti kabisa. Cleo ni baba wa Lisa McDowell, ambaye ndiye anayemvutia Akeem (aliyechezwa na Eddie Murphy), mfalme mtarajiwa kutoka nchi ya kufikirika ya Zamunda.
John Amos kama Cleo McDowell katika filamu ya Coming to America (1988)
Amos alifanya uigizaji wa kuchekesha na wa kuvutia kama baba anayemlinda binti yake na kwa kiasi fulani anayeangalia maslahi ya kifedha, kwa kuwa mwanzoni anapendelea Lisa aolewe na Darryl Jenks, mtoto wa tajiri mkubwa wa bidhaa za nywele. Hata hivyo, baadaye anakuja kuelewa upendo wa kweli kati ya Akeem na Lisa, na hatimaye anamuunga mkono.
Amos pia alirudi kuigiza tena kama Cleo McDowell kwenye muendelezo wa filamu hiyo, Coming 2 America (2021).
Amos ni mtu mwingine kutoka kwenye filamu hiyo kufariki hivi karibuni. Mnamo Septemba mwaka huu, Mkongwe wa filamu za Hollywood, James Earl Jones alifariki akiwa na Umri wa Miaka 93.
Katika filamu hiyo, Sir James Earl Jones aliigiza kama Mfalme Jaffe Joffer, mfalme wa nchi ya kufikirika ya Zamunda na baba wa Prince Akeem, aliyechezwa na Eddie Murphy. Mfalme Jaffe Joffer ni kiongozi mwenye nguvu na utajiri mkubwa, lakini pia ni mkali na mwenye msimamo. Ana matumaini kwamba mwanawe, Prince Akeem, atafuata mila za kifalme za ndoa kwa kuoana na mwanamke aliyechaguliwa tayari kwa ajili yake.
John Amos na James Earl Jones katika kipande cha filamu ya Coming to America (1988)
James Earl Jones aliigiza vizuri kuonesha hadhi ya kifalme na ucheshi wa kistaarabu, huku akiweka msisitizo kwenye matarajio ya kifamilia na mila za utawala wa kifalme wa Zamunda. Pia alirejea katika nafasi yake kama Mfalme Jaffe Joffer katika Coming 2 America (2021).
Katika filamu ya Coming 2 America (2021) alionekana mcheza kikapu wa zamani mwenye asili ya DR Congo, Dikembe Mutombo, ambaye naye kwa bahati mbaya ameaga dunia Jumatatu tarehe 30 Septemba, 2024 ikiwa ni siku moja kabla ya kutangazwa kifo cha Amos, na siku kama siku 20 tangu Sir James Earl Jones kuuaga uso wa dunia.
Pumzikeni kwa amani, champs!
