Pongezi kwa Mamlaka ya Mapato Tanzania (TRA) katika maadhimisho ya miaka 30 yake

Katika kuelekea maadhimisho ya miaka 30 tangu kuanzishwa kwa Mamlaka ya Mapato Tanzania (TRA), napenda kuchukua fursa hii kutoa pongezi za dhati kwa viongozi, menejimenti na wafanyakazi wote wa TRA kwa kazi kubwa na mafanikio yaliyopatikana katika kipindi chote cha miaka hiyo.

Kwa hakika, miaka 30 ya TRA imeambatana na mabadiliko makubwa na ya kujivunia katika usimamizi wa mapato ya Serikali pamoja na utoaji wa huduma kwa walipakodi. Kutoka katika enzi za Mapato House (Long Room) ambapo huduma nyingi zilikuwa zinatolewa kwa njia za kawaida za karatasi, hadi kufikia zama za sasa za huduma za kidijitali na matumizi ya mifumo mbalimbali ya kisasa, ni ushahidi wa dhamira yenu ya kuboresha huduma na kuongeza ufanisi.

Aidha, hatua ya kusogeza huduma karibu zaidi na wananchi kupitia uanzishwaji wa ofisi za TRA katika wilaya mbalimbali pamoja na vituo vya huduma (service centres) imeongeza urahisi wa upatikanaji wa huduma za kikodi kwa wananchi na wafanyabiashara.

Kama mdau wa maendeleo ya nchi yetu, nimekuwa nikifuatilia taarifa mbalimbali zinazoonesha jinsi TRA inavyoendelea kuvunja rekodi za makusanyo ya mapato mwaka hadi mwaka. Haya ni mafanikio makubwa yanayostahili pongezi, kwa kuwa jukumu la ukusanyaji wa mapato si rahisi na linahitaji weledi, uvumilivu, uwajibikaji na uzalendo wa hali ya juu.

Vilevile, kumekuwa na maboresho makubwa katika mahusiano kati ya TRA na jamii. Tofauti na ilivyokuwa zamani, sasa elimu kwa walipakodi imepewa kipaumbele zaidi, huku huduma zikitolewa kwa ushirikiano, usikivu na maelewano. Hali hii imejenga imani kubwa kati ya TRA na wananchi.

Ninapenda pia kupongeza juhudi za kuendelea kuboresha mifumo ya kikodi na forodha, ikiwemo mabadiliko kutoka mifumo ya awali hadi mifumo ya kisasa kama ASYCUDA na TANCIS, ambayo imeongeza uwazi, ufanisi na urahisi katika utoaji wa huduma.

Kwa namna ya kipekee, napenda kupongeza ubunifu wa kupeleka elimu kwa walipakodi moja kwa moja katika maeneo yao ya biashara. Kampeni hizi za kuwafikia wafanyabiashara mahali walipo zimekuwa msaada mkubwa katika kuongeza uelewa wa masuala ya kodi na kujenga mahusiano mazuri kati ya TRA na walipakodi.

Pia, hatua ya kuanzisha magari ya huduma za kodi yanayofika moja kwa moja kwa wananchi katika maeneo mbalimbali ni ubunifu unaostahili kupongezwa. Huduma hizi zimepunguza gharama na muda wa wananchi kufuata huduma za kikodi katika ofisi za TRA.

Mafanikio haya yote yamekuwa na mchango mkubwa katika kuimarisha uwezo wa Serikali wa kutekeleza miradi mikubwa ya maendeleo inayowanufaisha Watanzania wote, ikiwemo:

• Bwawa la Julius Nyerere
• Standard Gauge Railway (SGR)
• Dar Rapid Transit (Mwendokasi)
• Daraja la Tanzanite
• Daraja la Wami
• Daraja la Mkapa
• Daraja la Kigamboni (Nyerere Bridge)
• Ujenzi na uboreshaji wa barabara mbalimbali nchini.
• Ujenzi na upanuzi wa viwanja vya ndege.
• Ununuzi wa ndege za Air Tanzania Company Limited na maboresho mengine mengi ya miundombinu ya kitaifa.

Wito wangu kwa TRA ni kuendelea kutumia mafanikio haya ya miaka 30 kama chachu ya kuongeza ufanisi, kuimarisha huduma bora kwa walipakodi na kuendeleza ushirikiano mzuri na jamii. Kadri mapato yanavyoongezeka, ndivyo uwezo wa Serikali wa kuwaletea wananchi maendeleo unavyozidi kuimarika.

Kwa mara nyingine, nawapongeza viongozi na wafanyakazi wote wa TRA kwa mafanikio haya makubwa ya miaka 30. Ni historia ya kujivunia na msingi imara wa mafanikio makubwa zaidi katika miaka ijayo.

Hongereni sana TRA kwa Miaka 30 ya Huduma kwa Taifa!