MATOKEO ya uchaguzi mdogo wa ubunge katika Jimbo la Kiteto yaliyompa ushindi wa asilimia 57 mgombea wa Chama Cha Mapinduzi (CCM), Benedict ole Nangoro, yanaonekana dhahiri kukichanganya Chama cha Demokrasia na Maendeleo (CHADEMA).
Kuchanganyikiwa kwa CHADEMA, chama ambacho viongozi wake wakuu walikuwa na matumaini makubwa ya kuibuka na ushindi wa kishindo, yanatajwa kuwa yamesababishwa na kubainika kwa ukweli kwamba watu waliopiga kura ni asilimia 47 tu ya watu wote waliokuwa wamesajiliwa kwa ajili ya uchaguzi katika jimbo zima.
Kupungua huko kwa wapiga kura kumewafanya viongozi na makada hao kuingiwa na hofu kuwa ushindi huo wa CCM kwa kiwango kikubwa unatokana na kufanyika kwa jitihada za chini kwa chini za kununua shahada za wapiga kura ambao walikuwa wakionyesha mwelekeo wa kukikataa chama hicho tawala.
Wasiwasi huo tayari umeifanya CHADEMA itangaze rasmi kuyakataa matokeo ya uchaguzi huo mdogo wa ubunge, ambao umefanyika kutokana na kufariki dunia kwa aliyekuwa mbunge wa jimbo hilo, Benedict Lusurutia.
Katika kuonyesha namna wanavyopinga ushindi huo wa CCM, viongozi wa CHADEMA na mgombea wake, Victor Kimesera, aliyevuna asilimia 41 ya kura zilizopigwa, hawakutokea katika hafla ya kutangaza matokeo hayo, licha ya kusubiriwa na Tume ya Taifa ya Uchaguzi (NEC) kuanzia saa 5:00 asubuhi hadi takriban saa 11:45 jioni jana.
Kushindwa kwa wapinzani katika uchaguzi huo, kunazidi kuifanya kambi hiyo ishindwe kuweka rekodi iliyowekwa kwa mara ya mwisho na John Cheyo, aliyeshinda uchaguzi mdogo wa ubunge wa Magu, mkoani Mwanza miaka 10 iliyopita.
Akizungumza muda mfupi baada ya NEC kutangaza matokeo hayo rasmi, Mwenyekiti wa Taifa wa CHADEMA, Freeman Mbowe, alisema kuwa chama chake kimedhamiria kwenda mahakamani kupinga ushindi huo wa CCM ambao alisema umepatikana katika misingi ya hila na udanganyifu.
Takwimu zilizotolewa na Tume ya Taifa ya Uchaguzi (NEC) jana jioni baada ya kuchelewesha kutangaza matokeo hayo kwa takriban siku nzima, zinaonyesha kuwa Nangoro alishinda kwa kupata kura 21,506, huku Kimesera akifuatia kwa kupata kura 12,561.
Mgombea wa Chama cha Sauti ya Umma (SAU), Mashaka Fundi, aliambulia kura 300 wakati yule wa PPT-Maendeleo, Juma Saidi, ambaye alitangaza awali kumuunga mkono mwenzake wa CHADEMA alipata kura 110.
Takwimu hizo za NEC zinaonyesha kuwa kati ya wapiga kura 74,629 walioandikishwa katika daftari hilo mwaka 2005 ni watu 35,261 tu walijitokeza kupiga kura hiyo juzi, idadi ambayo kwa kiwango kikubwa ndiyo iliyoishtua CHADEMA.
Kwa upande mwingine, matokeo hayo ya NEC yanaonyesha kwamba, kura halali zilizohesabiwa katika uchaguzi huo zilikuwa ni 34,477, wakati zilizoharibika zikiwa ni kura 784.
Akizungumza baada ya kutangaza matokeo hayo, msimamizi wa uchaguzi huo, Faustime Kangombe, alisema kuwa, kujitokeza kwa watu wachache kupiga kura kunatokana na wengi wao kuwa mashambani wakati huu, wakiendelea na shughuli za kilimo.
Kwa upande wake, Mbowe alisema kuwa, pamoja na hujuma hizo, kitendo cha Mkuu wa Mkoa wa Manyara, Henry Shekifu, ambaye ni kada wa CCM kufanya ziara na kufungua miradi ya maendeleo katika Jimbo la Kiteto wakati wa kipindi cha kampeni ni ukiukwaji mkubwa wa taratibu za uchaguzi, ambazo hazina budi kupata majibu ya kisheria.
Mbowe alisema kitendo hicho cha Shekifu ambaye ni kada wa CCM kufanya vitendo hivyo, ilikuwa ni ishara ya wazi kuwa alichokuwa akikifanya kilikuwa ni kampeni za wazi kwa mgombea wa chama hicho tawala.
Hata hivyo, kwa siku kadhaa sasa, Shekifu ambaye alikuwa mbunge hadi mwaka 2005, alikana kufanya kampeni kuisaidia CCM, kwa kusema kuwa ziara alizokuwa anazifanya ni za kawaida kwa yeye kama mkuu wa mkoa.
Alisema kuwa hakuna sheria inayomzuia yeye kutembelea eneo lolote la mkoa wake na kuwa hakufanya hivyo wakati huu kwa lengo la kumpigia kampeni aliyekuwa mgombea wa CCM bali kuhimiza maendeleo.
Kwa muda mrefu jana asubuhi, Mbowe alikuwa na kazi nzito ya kuwazuia wafuasi wa chama hicho wa maeneo yote ya Kibaya, waliokuwa wakitaka kuandamana kwenda kwenye ofisi za NEC kupinga matokeo hayo.
Vijana hao waliandaa mabango ambayo wangeyatumia katika maandamano yao lakini Mbowe aliwazuia akisema kuwa hakuna busara yoyote katika kufanya maandamano katika mazingira ambayo yalikuwepo jana mjini hapa.
Turudi Dar es Salaam na tutafungua kesi. Hakuna haja ya kuandamana, mtaumizwa na polisi bila sababu, alisema Mbowe na akawataka vijana hao kuwa watulivu, kwani mapambano ya kusaka ushindi huo bado hayajaisha.
Hata hivyo, aliwalaumu watu ambao walikubali kuingia katika mtego wa kuuza shahada zao na kubainisha kuwa wao ndio waliosababisha matokeo hayo yawe kama yalivyo.
Alisema kuwa chama hicho kina ushahidi wa tuhuma zote ambazo wamezitoa na hivyo wana uhakika wa kushinda katika kesi watakayofungua.
Mbali ya hilo, Mbowe alisema chama chake kinatarajia kufungua kesi ya kikatiba dhidi ya Daftari la Wapiga Kura ambalo limepoteza matumaini yaliyojengeka juu yake, hasa baada ya wapinzani wao kuanza kulitumia kujinufaisha.
Alisema iwapo hatua za makusudi na za mara moja hazitachukuliwa dhidi ya udhibiti wa Daftari la Wapiga Kura, basi litakuwa ni jambo gumu kwa wagombea wa kambi ya upinzani kushinda katika uchaguzi mwingine wowote.