Ukweli ulofichika kuhusu Bonoko.

BONOKO.


1.Katikiro najituma,kuleta huu ujumbe
Waziwazi nausema,sitoogopa wapambe
Nanena huku nahema,roho inadunda kumbe
Kileta kindumbwendumbwe,utawekewa bonoko.

2.funga domo usiseme,wasikuvishe gandalo
Kama neno uliteme,usije okotwa kolo
Kwa mengine we jitume,jifanye wapanga solo
Kileta kindumbwendumbwe,utawekewa bonoko.

3.Sombombi niitwe Mimi,kisa nasema ukweli
Moja tano mbili kumi,nilijua afadhali
Kumbe nang'ata kilimi,tuone mbili tumbili
Kileta kindumbwendumbwe,utawekewa bonoko.

4.Wala haelewi somo,wajua mang'amung'amu
Kwake ni kama kisomo,kihamka hana hamu
Hapo afungua domo,kusema bila fahamu
Kileta kindumbwendumbwe,utawekewa bonoko.

5.Twamini hii ni sumu,na visa vya sokomoko
Kunayo imara timu,yavuruga tuendako
Tuziweke chini simu,tujadilini kitako
Tuache kindumbwendumbwe,ituepuke bonoko ?

SHAIRI-BONOKO
MTUNZI-Idd Ninga, Tengeru Arusha.
+255624010160
iddyallyninga@gmail.com