Hawa jamaa kama kweli wana imani, ... ya Mungu wamwachie Mungu na ya Kaisari wampe Kaisari
Waliodai Yesu anakuja wafungwa miaka minne
:: Waliwatorosha watoto wa shule wakampokee Bwana
na ahmed makongo, bunda
MAHAKAMA ya Wilaya ya Bunda mkoani Mara, imewahukumu Wasabato wawili wenye msimamo mkali, kifungo cha miaka minne jela, baada ya kukiri kosa la kuwatorosha wanafunzi watatu wa shule ya msingi ili wamsubiri Yesu.
Wasabato hao, katika mahubiri yao, walisema Yesu angeshuka wakati wowote mwezi huu kutoka mbinguni.
Waliopewa adhabu hiyo iliyotolewa na Hakimu Mwandamizi Mfawidhi wa Mahakama hiyo, Richard Maganga, ni Lameck Masaka (45) na
Akisa Mbula (40); wote wakazi wa Kijiji cha Kiagata, Musoma Vijijini.
Hakimu Maganga alisema kuwa kutokana na kukiri makosa, kila mshitakiwa atatumikia kifungo cha miaka miwili jela.
Awali, ilidaiwa mahakamani hapo na Mwendesha Mashitaka wa Polisi, Inspekta Edward Manoni, kuwa kati ya Machi 2 na 8, mwaka huu, washitakiwa ambao ni wazazi wa wanafunzi hao, waliwatorosha na kuwapeleka Kiagata, ambako walidai kwamba wanamsubiri Yesu ambaye angeshuka kijijini hapo. Inspekta Manoni alisema kuwa washitakiwa hao walifanya kosa hilo la kuwarubuni watoto na kuacha masomo kinyume cha sheria, huku wakijua kuwa kufanya hivyo ni kosa kubwa, kwani wanawanyima watoto haki yao ya msingi ya kupata elimu.
Washitakiwa wanadaiwa kuwa ni sehemu ya waumini wenye msimamo mkali waliojiengua kutoka kwenye Kanisa halisi.
Baada ya kuanzisha kanisa lao, waliweka kambi katika Kijiji cha Kiagata, kwa madai kuwa wanamsubiri YesuKristo.
Baadhi ya waumini waliuza vitu vyao, huku wanafunzi wakikataa kusoma kwa madai kuwa hakuna haja ya kusoma wakati ufalme wa Mungu umekwisha wadia.
Kambi ya Wasabato hao ilivunjwa na polisi kutokana na agizo la Serikali mkoani Mara.
Hii ni mara ya pili kwa Mahakama ya Wilaya ya Bunda, kuhumu Wasabato wanaodaiwa kuwa wenye msimamo mkali kwa makosa ya kutorosha wanafunzi.
Katika shauri la awali, wanawake wawili walihukumiwa kutumikia kifungo cha miaka minne jela.
MTANZANIA