KERO Waraka wa kuwasilisha changamoto na mapendekezo ya maboresho ya mfumo wa ajira kwa wahitimu wa utalii

Hii ni kero ambayo mwananchi ameiwasilisha JF akitaka wahusika kuchukua hatua
A

Anonymous

Guest
Somo: Ombi la Mapitio ya Mfumo wa Ajira kwa Wahitimu wa National College of Tourism

Mheshimiwa,
Kwa heshima na taadhima, napenda kuwasilisha waraka huu kwa lengo la kuangazia changamoto ya ajira inayowakabili wahitimu wa Chuo cha Taifa cha Utalii (National College of Tourism), pamoja na athari zake kwa ukuaji wa sekta ya utalii na mapato ya Taifa.

Wahitimu wa chuo hiki hupata mafunzo ya kitaaluma na vitendo (field practical training), na wengi wao hujitolea katika taasisi mbalimbali za utalii nchini. Wamekuwa wakitoa huduma katika hifadhi, ofisi za utalii, hoteli, kampuni za utalii, na taasisi za umma na binafsi. Hata hivyo, pamoja na uzoefu wao wa moja kwa moja kazini, mfumo wa ajira hauwapi kipaumbele wala kuwatambua ipasavyo katika nafasi rasmi za ajira.

Hali hii si tu kwamba inapunguza motisha kwa vijana waliobobea katika taaluma ya utalii, bali pia inalifanya Taifa kupoteza rasilimali watu waliokwisha andaliwa kwa gharama na muda.

MAENEO MUHIMU AMBAYO NCHI INAPOTEZA MAPATO KWA KUTOWAAJIRI WATAALAMU WA UTALII

1. Viwanja vya Ndege katika Mikoa ya Kitalii

Viwanja vya ndege ni lango kuu la watalii wanaoingia nchini. Katika baadhi ya maeneo, watalii hawapati taarifa za kina kuhusu vivutio vyote vilivyopo katika wilaya na mikoa wanayoifikia. Kutokana na kukosekana kwa wataalamu wa utalii wenye ujuzi wa mawasiliano, masoko na huduma kwa wateja, vivutio vingi hubaki kutotambulika na hivyo kupunguza mzunguko wa watalii na mapato ya ndani.

2. Mipakani (Border Points)
Haya ni maeneo ambayo watalii wengi hupitia wakiwa safarini kuingia au kutoka nchini. Kukosekana kwa maafisa waliobobea katika utalii kunasababisha watalii kukosa taarifa za fursa za kiutalii zilizopo Tanzania, hali inayoweza kuwafanya kupita moja kwa moja bila kutembelea au kutumia huduma za ndani.

3. Ofisi za Mikoa na Halmashauri
Mamlaka za Serikali za Mitaa zinasimamia au kumiliki vivutio mbalimbali vya utalii. Hata hivyo, vivutio vingi vinakosa soko na mvuto kwa sababu ya kukosekana kwa wataalamu wa utalii wenye uwezo wa kupanga, kutangaza na kukuza bidhaa za utalii. Kuajiri wahitimu wa utalii katika ngazi hizi kutachochea ubunifu, uendelezaji wa vivutio na ongezeko la mapato ya ndani.

4. Vyombo vya Ulinzi na Usalama (Jeshi la Polisi)
Katika kushughulikia kesi au changamoto zinazowahusu watalii, uwepo wa askari wenye elimu ya utalii na uelewa wa maadili ya kimataifa ya sekta hii ungeongeza weledi katika usuluhishi na kulinda taswira ya nchi.

Aidha, imeonekana kuwa pindi ajira za Jeshi la Polisi zinapotangazwa, wahitimu kutoka vyuo mbalimbali huruhusiwa kuomba nafasi hizo. Hata hivyo, mhitimu wa National College of Tourism mara nyingi hukosa fursa hiyo kwa sababu mfumo wa ajira hauitambui taaluma ya utalii kama sifa inayokubalika. Hii inawanyima wahitimu hao haki hata ya kuomba, licha ya kuwa na maarifa yanayohusiana moja kwa moja na huduma kwa wageni, lugha za kigeni, usalama wa watalii na maadili ya sekta.

5. Hifadhi na Maeneo ya Uhifadhi
Wanafunzi na wahitimu wa Chuo cha Taifa cha Utalii wamekuwa wakijitolea kama waongoza watalii katika hifadhi nyingi nchini, hususan zilizo chini ya Tanzania Wildlife Management Authority (TAWA) na Tanzania Forest Services (TFS).

Asilimia kubwa ya hifadhi hizi hazikosi wanafunzi wa chuo hiki, jambo linaloonyesha wazi kuwa umuhimu wao unatambulika katika utendaji wa kila siku. Hivyo basi, kuna haja ya kuwaajiri rasmi ili kuimarisha huduma na kuongeza mapato ya sekta.

UHALALI WA KITAALUMA WA WAHITIMU WA UTALII

Kwa mujibu wa mtaala wa National College of Tourism, wahitimu wa Diploma na Certificate katika Travel and Tourism husoma masomo yenye uzito mkubwa kama:

Tourism Law, Policy and Planning

Tourism Safety and Security Management

First Aid and Emergency Care

Customer Service Management

Travel Information and Communication Technology

Airline Geography

Tourism Marketing

Tourism Economics

Sustainable Tourism

Human Resources Management

Tour Guiding Skills and Techniques

Wildlife Resources

Masomo haya yanaendana moja kwa moja na:

1. Kazi za Polisi na Usalama:

Somu la Tourism Safety and Security Management pamoja na First Aid and Emergency Care linaandaa wahitimu kushughulikia changamoto zinazowahusu watalii kwa weledi mkubwa.

2. Viwanja vya Ndege na Mipakani:
Masomo ya Airline Geography, Travel Information and Communication Technology, na Customer Service Management yanawawezesha kutoa taarifa sahihi kwa watalii wanaoingia au kutoka nchini.

3. Halmashauri na Ofisi za Mikoa:
Masomo ya Tourism Marketing, Tourism Economics, na Tourism Policy and Planning yanawajengea uwezo wa kutangaza, kupanga na kukuza vivutio vya utalii katika ngazi za mikoa na wilaya.

4. Hifadhi za Taifa na Maeneo ya Uhifadhi:
Kupitia masomo ya Tour Guiding Skills, Wildlife Resources, na Sustainable Tourism, wahitimu hawa tayari wamekuwa wakifanya kazi kwa vitendo katika hifadhi nyingi nchini, jambo linaloonyesha wazi kuwa umuhimu wao unatambulika katika utendaji wa kila siku.

Masomo haya yanawajengea uwezo wa kushughulikia masuala ya usalama wa watalii, mawasiliano ya kimataifa, huduma kwa wateja, uendeshaji wa masoko ya utalii, pamoja na usimamizi wa rasilimali za utalii.

Kutowapa ajira rasmi wataalamu hawa ni sawa na kupoteza nguvu kazi yenye ujuzi maalum ambao tayari umeandaliwa kwa ajili ya kukuza sekta ya utalii.

MAPENDEKEZO
Kwa kuzingatia hoja hizi, tunaomba:

1. Kufanyika kwa mapitio ya sera na mifumo ya ajira ili kutambua rasmi taaluma ya utalii katika ajira za umma.

2. Kuwekwa kwa kipaumbele cha ajira kwa wahitimu waliopitia mafunzo ya vitendo katika taasisi husika.

3. Kupanua wigo wa taaluma zinazotambulika katika ajira za vyombo vya ulinzi na usalama.

4. Kuanzishwa kwa mpango maalum wa ajira katika maeneo ya kimkakati kama viwanja vya ndege, mipakani, halmashauri na hifadhi.

Tunaamini kuwa utekelezaji wa mapendekezo haya utaongeza tija katika sekta ya utalii, kuongeza ajira kwa vijana, na kuimarisha mapato ya Taifa.

Tunaiomba Wizara itafakari kwa kina hoja hii kwa maslahi ya sekta ya utalii na maendeleo ya nchi kwa ujumla.
 
Cookies are required to use this site. You must accept them to continue using the site. Learn more…