Benny Haraba
JF-Expert Member
- Dec 7, 2012
- 13,336
- 12,370
J
Je hawataenda maporini ?
Waziri wa Nchi Ofisi ya Waziri Mkuu Sera Bunge na Uratibu Ndg. William Lukuvi akiwa ameambatana na Msajili wa Vyama vya Siasa Jaji Francis Mtungi leo 07/10/2024 ametembelea Ofisi za Makao Makuu ya ACT Wazalendo na kupokelewa na Kiongozi wa Chama Ndg. dorothy Semu aliyeambatana na Katibu Mkuu Ndg. Ado Shaibu.
Katika mazungumzo yao, KC Dorothy Semu amemweleza Waziri Lukuvi hofu waliyonayo wananchi kuhusu chaguzi zijazo za Serikali za Mitaa na Uchaguzi Mkuu 2025 ikiwa zitakuwa huru na za haki.
Ndugu Semu amesema katika ziara ya Chama iliyofanyika katika majimbo yote nchini viongozi wameelezwa na kujionea hali ya wananchi isiyoridhisha na kwamba bado hawana imani na vyombo vya serikali katika kusimamia masuala yao ikiwemo uwepo wa uchaguzi huru na wa haki. Vilevile, watendaji wa ngazi za chini bado wanaendelea na vitisho kwa wananchi ili kuwazuia wasishiriki kutekeleza haki zao za kidemokrasia na kiraia.
Kwa upande wake, Waziri Lukuvi akitoa salamu za Rais wa Jamhuri ya Muungano wa Tanzania, Ndugu Samia Suluhu amewahakikishia viongozi wa ACT Wazalendo kuwa Rais Samia amedhamiria kuhakikisha kuwa chaguzi zote zitakazofanyika wakati wa utawala wake zitakuwa zenye heshima, huru na za haki.
Aidha, Ndugu Lukuvi amempongeza Ndugu Dorothy Semu kwa kuwa mwanamke wa kwanza katika historia ya ACT Wazalendo kuaminiwa na kuchaguliwa katika nafasi ya juu kabisa ya uongozi wa Chama na kwamba hiyo inaonesha kiasi gani Chama kimemwamini.
Ndugu Lukuvi ametumia fursa hiyo pia kumpongeza Kiongozi wa Chama Mstaafu Ndugu Zitto kwa hatua yake ya kuachia madaraka na kutoa nafasi kwa wengine jambo ambalo limekuwa gumu kwa wanasiasa wengi.
"Nampongeza sana pia Zitto. Kwa umri mdogo alionao, na ukizingatia ndiye mwasisi wa Chama, kukubali kuachia madaraka ya uongozi, ametoa funzo kubwa. Anaonyesha ukomavu wa kutosha katika fikra zake" amesema.
Ziara ya Waziri Lukuvi katika ofisi za Makao Makuu ya Chama leo ni sehemu ya utaratibu aliojiwekea akiwa Waziri mwenye dhamana na Vyama vya Siasa kutembelea vyama hivyo na kubadilishana mawazo wakati huu nchi inapoelekea katika chaguzi.