Mashabiki wa soka nchini Kenya wanatarajiwa kupata burudani ya kipekee Ijumaa, Novemba 13, 2026, wakati wachezaji wa zamani wa klabu ya Arsenal watakapokutana na magwiji wa timu ya taifa ya Kenya, Harambee Stars, katika mechi maalum jijini Nairobi.
Mechi hiyo iliyopewa jina la Legends Cup itachezwa katika Uwanja wa Nyayo National Stadium kuanzia saa moja usiku (7:00 PM).
Mchezo huo unalenga kuwakutanisha mashabiki wa Arsenal na wapenzi wa soka la Kenya ili kukumbuka nyakati za kihistoria na mchango wa wachezaji waliowahi kulitumikia soka kwa miaka mingi.
Kwa mujibu wa taarifa zilizochapishwa kwenye jukwaa la MyTickets Africa, tiketi za kuingia uwanjani zinapatikana kwa viwango tofauti kulingana na maeneo ya kukaa.
Tiketi za Regular Early Bird zinauzwa kwa KSh 500, huku Regular Wave 1 zikiwa KSh 1,000 na Wave 2 zikiwa KSh 2,000.
Mashabiki wanaotaka huduma za kipekee wanaweza kununua tiketi za VIP kwa KSh 10,000 au VVIP kwa KSh 20,000.
Tiketi zinapatikana kupitia tovuti ya MyTickets Africa, ambapo baada ya kufanya malipo, mnunuzi atapokea tiketi kupitia SMS au barua pepe.
Mchezo huo unatarajiwa kuwa fursa kwa mashabiki kukutana na baadhi ya nyota waliowahi kuandika historia katika klabu ya Arsenal na timu ya taifa ya Kenya.
Je, ungependa kushuhudia Arsenal Legends wakimenyana na magwiji wa Harambee Stars? Unadhani ni upande gani utashinda mchezo huo?