HPAUL
JF-Expert Member
- Jan 18, 2011
- 410
- 567
Athari 6 Ligi Kuu Bara kama ikifutwa
Tayari nchini Ubelgiji ligi ya nchini humo imefutwa na klabu iliyokuwa inaongoza kwenye msimamo wa ligi hiyo, Club Brugge ikitawazwa kuwa mabingwa, huku klabu ya zamani ya Mtanzania Mbwana Samatta, KRC Genk ikifuzu moja kwa moja Ligi ya Mabingwa Ulaya.
Lakini pia kutokana na ligi hiyo kusitishwa kutokana na janga la corona, hakuna timu iliyoshuka daraja msimu huu, huku timu mbili zikipandishwa.
Nchini Tanzania, nako kumekuwa na mijadala inayoendelea kwenye redio, televisheni, mitandaoni na hata vijiweni juu ya mustakabali wa ligi hiyo, kama janga litaendelea kuwa kubwa na serikali ikaendelea kusimamisha michezo yote nchini.
Wengine wanadai ligi ifutwe na msimu huu kusiwe na bingwa, badala yake timu zianze kujiandaa na msimu ujao. Kuna baadhi yao wanadai ligi ifutwe, lakini anayeongozwa apewe ubingwa wake. Wapo wanaotaka ligi ikifutwa, basi bingwa wa msimu uliopita ndiye awakilishe nchini kwenye michuano ya kimataifa.
Hata hivyo, Katibu Mkuu wa Shirikisho la Soka nchini (TFF), Wilfred Kidao, akizungumza na wanahabari majuzi, alisema mustakabali wa msimu huu wa Ligi Kuu Tanzania Bara utaamuliwa na vikao maalum, iwapo tu janga hili litaendelea na kuwa tishio na si vinginevyo na kuongeza kuwa, hata hivyo bado ni mapema kuliongelea suala hilo.
"Bado ni mapema sana kusema tumefuta msimu, pamoja na kwamba msimu unaweza kwenda hadi Juni 31," alisema.
Kwa maana hiyo ili kuwa na uwezekano na ligi kufutwa ni lazima kwanza ifike Juni 31 na ligi iwe bado imesimama. Hata hivyo, kuna athari kubwa kama Ligi Kuu Tanzania Bara msimu huu itafutwa.
Katika makala haya tumekukusanyia baadhi ya athari iwapo jambo hilo litatokea, tiririka nayo
1. Michuano ya Kombe la FA nayo kufutwa
Kwa sababu yote ni michezo ya soka, hivyo sababu zitakazofanya Ligi Kuu kufutwa ndizo hizo hizo zitaifanya michuano ya Kombe la Shirikisho la Soka Tanzania (TFF), maarufu kama Kombe la FA nalo kufutwa msimu huu pia.
Kwa maana hiyo, timu zote zilizofanikiwa kuingia hatua ya robo fainali nazo pia hazitocheza tena, ikiwamo Simba, Yanga, Azam na Namungo ambazo zilikuwa zikipigana vikumbo kuwania kuiwakilisha nchi kwenye michuano ya Kombe la Shirikisho Afrika msimu ujao.
2. Simba, Azam kuwakilisha tena nchi
Iwapo Ligi Kuu msimu huu itafutwa na kama Simba itapewa ubingwa kwa sababu inaongoza ligi, basi itaiwakilisha nchi msimu ujao kwenye Ligi ya Mabingwa Afrika na kwa sababu FA haitokuwapo, Azam FC itaiwakilisha nchini kwenye michuano ya Kombe la Shirikisho kiulaini kwa sababu ndiye bingwa wa msimu uliopita.
3. Mechi Simba, Yanga na zote msimu huu kufutwa
Kama corona ikiendelea bila ufumbuzi na ikaamuliwa Ligi Kuu ifutwe ni kwamba mechi zote 284 zilizochezwa msimu huu mpaka sasa zitakuwa zimefutwa na hazitowekwa kwenye rekodi yoyote ile kwa sababu ligi haikukamilika. Kadhalika, mechi zote mbili za Simba na Yanga nazo ni kati ya mechi 284, hivyo hazitokuwamo kwenye rekodi yoyote ile ya mechi za Ligi Kuu baina ya watani wa jadi kwa sababu ligi imefutwa.
Kwenye mechi ya kwanza Januari 4, mwaka huu, timu hizo zilitoka sare ya mabao 2-2 na Machi 8, mwaka huu, Yanga iliichapa Simba bao 1-0 lililofungwa na Benard Morrison. Hapa ni kwamba Yanga itaathirika na rekodi yake kwenye mechi hizi, hasa ya pili.
4. Timu za Daraja la Kwanza kutopanda
Gwambina FC ni moja kati ya timu zenye uhakika wa moja kwa moja msimu ujao kucheza Ligi Kuu, kama Ligi Daraja la Kwanza itaendelea.
Timu za Ihefu FC na Dodoma FC nazo zinapigana kufa na kupona kuhakikisha zinapanda. Kama corona ikiendelea kuwa tishio na kusababisha ligi kufutwa, kuna uwezekano mkubwa timu zisishuke daraja msimu huu. Na kama hazitoshuka, basi hakutokuwa na timu yoyote itakayopanda Ligi Kuu msimu ujao.
Hii inatokana na kwamba tayari Ligi Kuu ina timu 20 na zilitakiwa zishuke nne na msimu ujao kuwe na timu 18 tu. Kwa maana hiyo sidhani kama TFF inaweza kuruhusu timu 22 au 24 msimu ujao.
6. Hasara kwa wadhamini wa Ligi, klabu
Kampuni iliyoingia mkataba wa kuonyesha mechi itakuwa imeingia hasara kwa sababu haitoonyesha tena ligi kwenye mechi zilizobaki, lakini pia kampuni ambazo zilikuwa zinatangaza bidhaa zao kwenye jezi za klabu, nazo pia zitakuwa zinahesabu maumivu kwa sababu hazitopata tena nafasi hiyo.
Chanzo: IPP Media
