BARUA YA WAZI KWA MTENDAJI MKUU WA KLABU YA SIMBA
Kwako Barbara Gonzalez
Mtendaji Mkuu wa Klabu ya Simba.
Kwa heshima kubwa nakuandikia barua hii nikiwa na uchungu na masikitiko makubwa sana kutokana na makosa yanayojirudiarudia kwa wachezaji wa Simba wanapokuwa uwanjani.
Nianze kwa kuuliza swali;- Hivi Klabu ya Simba haina mtaalam wa kuchambua mechi na kuchambua utendaji wa wachezaji yaani Match and Player Performance Analyst? Kama yupo mbona hazionekani athari chanya( Positive Impact) kwa wachezaji mmoja mmoja na timu kwa ujumla?
Ukiziangalia mechi nyingi zilizochezwa na Klabu ya Simba, utagundua kuna maradhi ambayo yapo kwa wachezaji wa Simba, ambayo ni maradhi ya muda mrefu sana yanaweza yakawa sugu yasipotafutiwa ufumbuzi wa kudumu.
Maradhi ambayo wanayo wachezaji wa Klabu ya Simba ni UKOSEFU WA MOYO WA KUIPAMBANIA/KUIPIGANIA TIMU (LACK OF FIGHTING SPIRIT FOR THE TEAM). Wachezaji wetu wakiwa uwanjani hawajitoi 100% kwa ajili ya timu kupata matokeo ya ushindi ingawa wanacheza vizuri. Unajua unaweza ukacheza vizuri na usipate matokeo ya ushindi kwa kuwa haupambani kwa ajili ya kushinda. Kila mchezaji katika nafasi yake anacheza kutimiza WAJIBU wake kwenye hiyo nafasi, lakini ifahamike kuwa katika kutimiza WAJIBU kunatakiwa kuwa na kitu cha ziada kwa mtu anayetimiza huo WAJIBU ili aweza kutimiza WAJIBU kwa kwa muda sahihi, kwa ufanisi na kwa uhakika.
MIFANO HALISI;-
Mfano wa kwanza:
Pitia mechi kadhaa za Simba za ndani na nje kisha angalia kwa umakini wachezaji wanapokosa goli, wengi wao hawaoneshi kuumizwa kwa kupoteza hiyo nafasi ya kufunga ni kama vile wanaamini watafunga tu.
Mfano wa pili:
Pitia mechi kadhaa za Simba za ndani na nje kisha angalia kwa umakini wachezaji wanapokuwa mmoja dhidi ya mmoja (ONE VS ONE) katika kuwania mpira wa mguuni na opponet wake, mara nyingi wachezaji wa Simba wanapoteza mpira na kumuacha mchezaji pinzani (OPPONET) kutembea na mpira huku anamsindikiza tu kwa macho.
Mfano wa Tatu:
Pitia mechi kadhaa za Simba za ndani na nje kisha angalia kwa umakini wachezaji wa Simba wanapokuwa wanawania mipira ya juu dhidi ya mpinzani wake, mara nyingi wachezaji wa Simba wanapoteza na mpinzani anafanikiwa kuucheza.
Halikadhalika, uchezaji wa timu ya Simba unaruhusu sana wachezaji wa timu pinzani kuwa huru katika kufanya maamuzi sahihi wanapokuwa na mpira. Wanaruhusu mchezaji wa timu pinzani kukokota mpira akisindikizwa tu na mchezaji wa Simba. Wanasubiria opponet mwenye mpira aidha afanye makosa miguuni mwake aua apige pasi yenye makosa. Hii ni mbaya sana maana inasababisha mashambulizi yasiyo ya lazima na kumfanya mpinzani awe huru kupanga mashambulizi mara kwa mara.
Ni ukweli usiopingika, Timu ya Simba ina wachezaji wazuri sana na imefanya usajili mzuri sana, tena imesajili wachezaji wenye kasi sana lakini kasi yao haionekani. Hii ni kutokana na MFUMO unaotumika na makocha wengi wa Simba.
USHAURI
Wachezaji wa Simba wanahitaji mtaalamu anayeweza kuwatengeneza kisaikologia ili wawe na ari na roho ya kuipambania timu(Fighting Spirit for the team). Wanahitaji mtu ambaye anauwezo wa kuipitia mechi iliyokwishachezwa na kuzungumza na wachezaji maeneo wanayotakiwa kuyafanyia marekebisho kwa pamoja na kwa mmoja mmoja(Collectively and individually). Hivyo Klabu haina budi kufanyia kazi eneo Hilo.
SIMBA NGUVU MOJA
Edwin RZK
Mdau wa Maendeleo ya Soka
TANZANIA
Nb: Hii post niliihifadhi. Sijaongeza Wala kupunguza herufi