Bongo legendary music festival ya 2022 : Ukurasa unaosahauliwa katika mjadala wa bongo fleva honours na miaka 30 ya bongo flava

Bongo legendary music festival ya 2022 : Ukurasa unaosahauliwa katika mjadala wa bongo fleva honours na miaka 30 ya bongo flava

Joined
Nov 8, 2018
Posts
38
Reaction score
43
BONGO LEGENDARY MUSIC FESTIVAL YA 2022
: UKURASA UNAOSAHAULIWA KATIKA MJADALA WA BONGO FLEVA HONOURS NA MIAKA 30 YA BONGO FLAVA

Kadiri mijadala kuhusu Bongo Fleva Honours na maadhimisho ya Miaka 30 ya Bongo Flava inavyoendelea, ni muhimu pia kuikumbuka historia ya matukio yaliyotangulia yaliyokuwa na dhamira ya kuwakusanya, kuwatambua na kuwaenzi wasanii waliochangia ukuaji wa muziki wa Bongo Flava.

Katika siku za hivi karibuni, kumekuwa na maoni kutoka kwa baadhi ya wadau wa muziki yanayotoa taswira kwamba harakati za kuwakumbuka na kuwapa heshima wasanii wa zamani wa Bongo Flava zimeanza kupitia Bongo Fleva Honours au maadhimisho ya Miaka 30 ya Bongo Flava. Hata hivyo, kabla ya matukio hayo, tayari kulikuwepo Bongo Legendary Festival, tamasha lililofanyika tarehe 14 Mei 2022 na kuwakutanisha idadi kubwa ya wasanii wa zamani wa Bongo Flava, Hip Hop na muziki wa mitaani.

Kwa hiyo, ili historia ibaki sahihi, ni muhimu kukumbuka kuwa juhudi za kuwakusanya na kuwakumbuka wasanii wa zamani wa Bongo Flava hazikuanza leo. Bongo Legendary Festival ilikuwa miongoni mwa matukio yaliyotangulia kuonyesha kuwa kulikuwa na hamasa ya kuwakutanisha wasanii wa zamani na kuwapa jukwaa la kuonekana tena mbele ya mashabiki.

Tamasha hilo liliwakutanisha majina mengi yaliyowahi kutikisa anga la muziki wa Tanzania. Miongoni mwa wasanii waliotajwa kushiriki walikuwa:

Baby Madaha, Squeezer, Hama Guy (Solid Ground Family), DJ Snox (Mabaga Fresh), JB (Mabaga Fresh), Stara Thomas, Kigwema, Makamua, PNC, Joslin, Daz P Manduli, Big (Solid Ground Family), Master V (Solid Ground Family), Soprano, Picco, Bladkey, Becka Title, Luten Karama (Gangwe Mobb), Bwana Misosi, Black wa Uswazi, Sister P, Chiku Keto, Dullayo, Summa G, Nyasi, Shozi, Kompyutah BDP, Matonya, MB Doggy, Daz Baba, Baby J, KR Mullah (TMK Wanaume Halisi), Amini, Mandojo, Domo Kaya, Pasha, Dark Master, Sultan King, GZ Solid, Dokii, Berry White, Man X, Rado, Berry Black, Jhikoman, Z-Anto, Sloter (LWP Majitu), Pingu, Q-Jay, Narlon (Manzese Crew), Nasa Isale BDP, Issa BDP, Galaton, Vitali Maemba (Sumu ya Teja), Enock K (TMK Majita), Fred Fid (TMK Majita), Nassa Kitasa (TMK Majita), Kidago (TMK Majita), Amour Genius, Ngemo, Doro (TMK Wanaume Halisi), Hashim (UVC), Idrisa (UVC), Spark, Waswahili, Deso na Danny Msimamo.

Orodha hiyo peke yake inaonyesha ukubwa wa maono yaliyokuwepo. Lengo lilikuwa kuwakutanisha wasanii wa vizazi tofauti ambao kwa miaka mingi walikuwa wamechangia kujenga kile kinachoitwa leo Bongo Flava.

Hata hivyo, pamoja na nia njema iliyokuwepo, Bongo Legendary Festival ilikumbana na changamoto kubwa za kifedha. Kwa mujibu wa wadau waliokuwa karibu na maandalizi ya tamasha hilo, changamoto zilianza tangu hatua za maandalizi, matangazo, uzalishaji wa tamasha hadi malipo ya wasanii. Tofauti na matukio yenye wadhamini wakubwa na bajeti kubwa, Bongo Legendary Festival ilitegemea kwa kiasi kikubwa michango ya wadau na mashabiki wa muziki.

Katika harakati hizo walionekana pia wasanii wakongwe kama Soggy Doggy, ambaye kwa sasa ni mtangazaji wa MJ FM jijini Dar es Salaam, pamoja na Bwana Misosi ambaye kwa sasa anafanya shughuli za uMC na ufundi umeme katika matukio mbalimbali. Wao pamoja na wadau wengine walihusika katika juhudi za kuhamasisha michango kutoka kwa mashabiki na wadau wa muziki ili kuhakikisha tamasha linafanyika.

Baada ya tamasha kumalizika, kulijitokeza malalamiko kutoka kwa baadhi ya wasanii kuhusu stahiki zao za ushiriki. Miongoni mwa majina yaliyotajwa kwenye mijadala ya wakati huo ni pamoja na Sister P, Daz P Manduli na wengine ambao walieleza kutoridhishwa kwao kuhusu malipo baada ya tamasha. Wadau wengi waliokuwa karibu na tukio hilo walieleza kuwa changamoto hizo zilichangiwa zaidi na hali ngumu ya kifedha iliyolikumba tamasha kuliko sababu nyingine.

Kutokana na changamoto hizo, Bongo Legendary Festival haikuweza kupata mwendelezo mkubwa kama ambavyo wengi walitarajia. Hata hivyo, ukweli unabaki kuwa tamasha hilo lilifanyika na likawa sehemu ya historia ya juhudi za kuwakusanya na kuwakumbuka wasanii wa zamani wa Bongo Flava.

Baadaye tasnia ilishuhudia kuibuka kwa Bongo Fleva Honours. Tukio hilo limefanikiwa kupata mwonekano mkubwa kupitia matangazo, usimamizi na uwezo wa kifedha wa maandalizi yake. Pia limejikita zaidi katika kutoa heshima kwa wasanii mmoja mmoja kwa kutambua mchango wao katika tasnia ya muziki.

Wakati huo huo, maadhimisho ya Miaka 30 ya Bongo Flava nayo yameibua mjadala mwingine miongoni mwa wadau wa muziki. Baadhi ya wadau wameeleza kutoridhishwa na kile wanachokiona kuwa ni uwakilishi mdogo wa baadhi ya wasanii wa zamani walioshiriki kujenga msingi wa muziki huu. Kwa mujibu wao, Bongo Flava haikujengwa na kundi dogo la watu wala majina machache maarufu. Muziki huu umejengwa na mamia ya wasanii, watayarishaji, mameneja, watangazaji wa redio, waandishi wa habari, wadhamini na mashabiki walioukuza kwa zaidi ya miaka 30.

HITIMISHO: UMAARUFU WA BONGO FLEVA HONOURS USIFUTE KUMBUKUMBU ZA BONGO LEGENDARY FESTIVAL YA 2022

Hakuna anayepaswa kufuta mchango wa mwingine. Umaarufu wa leo haupaswi kufuta kumbukumbu za jana.

Kama Bongo Fleva Honours imefanikiwa kupata mwonekano mkubwa zaidi, hilo ni jambo jema kwa tasnia. Lakini historia inapaswa kutambua kwamba kabla yake kulikuwepo Bongo Legendary Festival ya mwaka 2022, ambayo nayo ilijaribu kuwakusanya na kuwakumbuka wasanii wa zamani wa Bongo Flava.

Mwisho wa siku, Bongo Flava haikujengwa na mtu mmoja, kundi moja au tamasha moja. Ilijengwa na mamia ya wasanii na wadau waliopambana kwa miaka mingi hadi kufikia hapa ilipo leo.

Leo usiku tukutane Bongo Fleva Honours, ambapo mgeni maalumu ni Jose Chameleone kutoka Uganda.

Na tarehe 8 Agosti 2026 tukutane Rock City Mall, Mwanza katika maadhimisho ya Miaka 30 ya Bongo Flava.

HISTORIA ISIFUTWE. HISTORIA ISIMULIWE. HISTORIA IHESHIMIWE.

BONGO LEGENDARY MUSIC FESTIVAL...

Tarehe 14/05/2022 kulifanyika Bongo Legendary Music Festival katika Gwambina Loungezamani TTC Club), Chang'ombe Temeke, Dar es Salaam.

Kiingilio kilikuwa ni Shilingi 5,000 tu mlangoni.

Leo hii, miaka minne baadaye, katika maadhimisho ya Miaka 30 ya Bongo Flava, kiingilio cha chini kabisa kimefikia Shilingi 50,000.

Hii inaonyesha namna thamani ya matamasha ya muziki wa Tanzania ilivyopanda kwa kasi, lakini pia imezua mjadala mkubwa kuhusu uwezo wa mashabiki wa kawaida kuhudhuria matamasha hayo.

Swali la kujiuliza ni hili:

Je, Bongo Flava imekua na kuwa bidhaa ya thamani zaidi, au gharama za matamasha zimeanza kuwa kikwazo kwa mashabiki waliokuwa msingi wa ukuaji wake?

Kutoka Sh 5,000 mwaka 2022 hadi Sh 50,000 mwaka 2026 — tofauti ni kubwa sana.

Maoni yako ni yapi?

Ukwaju wa kitambo

#UkwajuWaKitambo
#Tunakurudisha
#BongoLegendaryFestival
#BongoFlevaHonours
#miaka30yabongoflava
1785462940146.jpg
1785461575538.jpg
 
Back
Top Bottom