CCM yakataa katiba mpya

Dingswayo · 2014-05-11T07:20:52+00:00

CHAMA Cha Mapinduzi (CCM) kimeweka wazi msimamo wake, kikisema kuwa hakina mpango na katiba mpya, na kwamba jambo muhimu kwao ni kuangalia matatizo ya wananchi. Msimamo huo ulitolewa na Katibu wa Halmashauri Kuu (NEC) Itikadi na Uenezi, Nape Nauye, mbele ya Katibu Mkuu, Abdulrahman Kinana juzi wilayani Igunga katika siku ya pili ya ziara ya chama hicho mkoani Tabora. Bila shaka kauli hiyo itaibua mjadala mzito kwa wananchi, ikizingatiwa kwamba Serikali ya CCM imeishatumia sh bilioni 74 kugharamia Tume ya Mabadiliko ya Katiba na zaidi ya sh bilioni 27 kwa ajili ya Bunge Maalumu la Katiba ambalo limejadili sura mbili tu hadi sasa. Akihutubia mkutano wa hadhara, Nape bila kuitaja kwa jina Tume ya Jaji Joseph Warioba iliyokusanya maoni ya wananchi, alisema kuwa wazo la muundo wa serikali tatu limeasisiwa na viongozi waliokengeuka ndani ya chama chake, ambao waliwahi kufaidi matunda ya serikali mbili. Salamu kwa wazee walio katika muda wa jioni na ambao wamekengeuka, hawa wamekula maisha katika muundo wa serikali mbili, sasa wanapoona wanaenda ukingoni ndiyo wanaanza kupiga kelele juu ya serikali tatu. Wamefilisika, alisema. Kwa mujibu wa Nape, hawatakuwa na haja ya katiba isiyoweka kipaumbele masuala muhimu ya wananchi, na kuyataja kuwa ni maisha bora, huduma za kiafya, elimu na uwekezaji katika kilimo. Aliongeza kuwa kauli ya kuwafidia wakulima walioshindwa kulima kutokana na mbegu kuota haitakuwa na maana kama muda waliopoteza hautafidiwa. Watalipwa fidia sawa, ila wamepoteza muda na sijui mawaziri wanaohusika wamefanya nini. Sisi chama tunapowaita kuwa ni mizigo wanatuchukia, lakini katika mazingira kama haya utawezaje kukwepa kuitwa mzigo? alihoji. Dalili za CCM kutotaka katiba mpya zilijidhihirisha tangu Jaji Warioba alipowasilisha rasimu ya katiba kwa Bunge Maalumu, ikiwa na mapendekezo ya muundo wa serikali tatu ambao chama hicho kinaupinga. Katika kuhakikisha maoni ya wananchi yanatupwa nje, CCM kupitia wajumbe wake walijaribu kuipindua rasimu kwenye kamati kwa kuondoa baadhi ya mapendekezo kwenye ibara za sura ya kwanza na sita na kuweka yale yanayozingatia muundo wa serikali mbili. Hatua hiyo iliibua malumbano makali ndani ya Bunge baina yao na wapinzani, hadi kufikia hatua ya wajumbe hao wa upinzani kupitia Umoja wao wa Katiba ya Wananchi (UKAWA) kususia Bunge. Tayari UKAWA wametangaza kutorudi bungeni hadi hapo CCM itakapokubali ijadiliwe rasimu yenye mapendekezo ya wananchi kama ilivyo bila kuchakachuliwa. Hata hivyo, katika kikao cha dharura cha Kamati Kuu (CC) ya CCM kilichofanyika hivi karibuni, chama hicho kimekataa kufanya maridhiano na UKAWA na badala yake kimetangaza kupambana nao nje ya Bunge Maalumu la Katiba, jambo linaloashiria kuwa katiba mpya itakuwa vigumu kupatikana. Naye Kinana, akizungumza na wana-CCM wa Igunga, alisema urasimu unaofanywa na watendaji wa serikali ndio unachangia mambo mengi ya wananchi kuharibika. Akiwa katika mkutano wa ndani wa kupokea ripoti ya Halmashauri Kuu ya CCM Wilaya ya Igunga, Kinana alisema kuwa watendaji wa serikali wameshindwa kwenda na kasi ya wananchi katika kujiletea maendeleo, hususan katika utoaji wa vibali vya aina mbalimbali. Nimeambiwa katika mji wa Igunga tatizo kubwa ni kutokupimwa kwa viwanja, na wananchi wapo tayari kwa hili, ila ninyi watendaji mnashindwa kwenda na kasi hiyo kwa sababu ya kutengeneza mazingira ya kuwakwamisha, hili hatutalikubali, alisema. Katika ziara hiyo, Mkuu wa Wilaya ya Igunga, Elibariki Kingu, alimweleza Kinana kuwa ana vijiji 70 ambavyo vina zahanati zilizokamilika, huku zikiwa hazifanyi kazi kutokana na kukosekana watoa huduma. Akifafanua kuhusu hilo, Kinana alisema hali hiyo inachangiwa na serikali kuamini kila jambo litafanikiwa kwa kufanywa kutoka jijini Dar es Salaam, huku akieleza kuwa watendaji wanaokaa mijini wanashindwa kutatua matatizo ya maeneo mengine kwa wakati kwa kuwa hayawagusi moja kwa moja. Alisema wajibu wa chama chake ni kukemea udhaifu wowote unaofanywa na serikali, na kuwataka viongozi wawasikilize wananchi wanataka jambo gani badala ya kulazimisha yale wanayoyataka wao.

Thread starter Dingswayo
Start date May 11, 2014

Dingswayo

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

CCM yakataa katiba mpya

Dingswayo

JF-Expert Member

Our Community

Regional Communities