Exuper Kachenje na Leon Bahati
MKUTANO wa Bunge unaoendelea mjini Dodoma umechukua sura mpya, ukionyesha wabunge kutuumia kama jukwaa la kampeni na pia sehemu ya kuundia mikakati ya kisiasa ya kujenga mazingira mazuri ya kushinda katika uchaguzi mkuu ujao, Mwananchi Jumapili limebaini.
Tangu kuanza kwa mkutano wa 16 wa Bunge la Bajeti Juni mwaka huu, idadi kubwa ya wageni waliotembelea wabunge mjini humo, wamekuwa wakibeba taswira ya kisiasa zaidi hali inayodhihirisha kampeni za chinichini kuingia bungeni huku wabunge wakitumia nafasi hiyo kujiosha kwa wapiga kura wao majimboni.
Baadhi ya wachunguzi wa mambo ya kisiasa, waliliambia gazeti hili kwamba wanachofanya wabunge kinaelekea kuwa ni kuwavuta karibu wale watu mashuhuri majimboni mwao, ambao wana nafasi nzuri ya kuweza kufanikisha malengo yao ya kisiasa.
Kila baada ya kipindi cha maswali na majibu Spika wa Bunge, Samweli Sitta, hutangaza wageni wanaowatembelea wabunge na uchunguzi wa gazeti hili umebaini kuwa wageni wengi ni wale wanaotegemewa kwenye malengo ya kujiimarisha kisiasa kwa wabunge.
Wabunge wa CCM ndiyo wanaotia fora kwa kuwa na wageni hao, ambao mara nyingi ni wale wanaohusika katika vikao vya maamuzi na wale wenye uwezo mkubwa wa kufanya kampeni.
Wageni hao ni kama vile makatibu na wenyeviti wa CCM ngazi za tawi, kata, wilaya na mkoa, viongozi mbalimbali wa jumuiya za chama, madiwani, wasanii, wafanyabiashara na wanafunzi wa vyuo na sekondari.
Wageni hao wanapofika Dodoma, hupata fursa ya kufanya vikao visivyo rasmi na wenyeji hao kwa ajili ya kupanga mikakati mbalimbali ya kisiasa.
Spika wa Bunge Samuel Sitta, hakuficha ukweli wa wageni wake waliomtembelea Alhamisi iliyopita, kwa kuthibitisha kuwa huyo ndiyo nafasi yake ya kujidhihirisha kisiasa.
Huku akitamba, Spika Sitta alitambulisha wageni wake wajumbe wa Kamati ya Siasa jimboni kwake Urambo Mashariki, akiwaelezea kuwa bila ya wao hawezi kufanya chochote.
Huku akitambulisha uongozi wa kamati hiyo kwa majina, alieleza kuwa kamati hiyo ndiyo inayomshauri na kuwa iwapo kuna mbunge hajawa na kamati kama hiyo basi ni wakati muafaka wa kuunda kamati hiyo.
``...Waheshimiwa nimechukua muda mrefu, kuwatambulisha hawa kwa sababu hili ndiyo jukwaa langu na huu ndiyo wakati muafaka. Waheshimiwa wabunge kama huna kamati ya kukushauri unda haraka, huu ndio wakati muafaka,`` alisema Spika Sitta.
Awali kabla ya kutambulisha wageni wake hao, Spika Sitta alitambulisha wageni wa wabunge mbalimbali pamoja na wageni aliowataja kuwa ni wa Shelukindo bila kufafanua yupi, mwenye wageni hao kati ya Mbunge wa Bumbuli, William Shelukindo na Mbunge wa Kilindi Beatrice Shelukindo.
Pamoja na wageni hao Mwenyekiti wa Chama Cha Demokrasia na Maendeleo (Chadema), Freeman Mbowe alitambulishwa kuwa mmoja wa wageni waliokuwepo bungeni jana, akiwa mgeni wa Katibu Mkuu wa Chama hicho na Mbunge wa Karatu, Dk Wilbroad Slaa.
Pamoja na wageni hao wa Shelukindo, Spika pia alitambulisha wageni wanne wa Kapteni John Chiligati mbunge wa Manyoni Mashariki ambaye pia ni Katibu wa Chama cha Mapinduzi (CCM), idara ya Uenezi, ambao wametoka Jimbo la Biharamulo Magharibi lililofanya uchaguzi wake wiki iliyopita na mgombea wa CCM, Oscar Mukasa kuibuka mshindi.
Hata hivyo, hali hiyo iliendelea katika vikao vya siku iliyofuata ambapo katika kikao cha Ijumaa asubuhi Spika Sitta alitambulisha wageni wa Mbunge mpya wa Jimbo la Biharamulo Magharibi (CCM) Oscra Mukasa aliyeapishwa Ijumaa asubuhi, aliowataja kuwa Mwenyekiti wa CCM mkoa wa Kagera Costansia Buhie, Mwenyekiti wa CCM Wilaya Biharamulo na Katibu wake.
Vilevile, katika kikao hicho cha Ijumaa Spika alitambulisha wageni wa James Lembeni ambaye ni Mbunge wa Kahama aliyetembelewa na Katibu wa CCM Wilaya, Mwenyekiti wa CCM Kata pamoja na Kada wa chama hicho mmoja huku Mbunge wa Rombo Basil Mramba akitembelewa na Mwenyekiti wa Halmashauri ya Wilaya ya Rombo Anthony Tesha.
Baadhi ya wageni wengine ambao waliwahi kutambulishwa bungeni katika vikao vilivyopita ni wa Mbunge wa Ilala, Mussa Azzan Zungu ambaye alitembelewa na kamati ya wapangaji wa Shirika la Nyumba Tanzania (NHC) walioongozwa na Mzee Gwao pamoja na Mchungaji Christopher Mtikila wa chama cha siasa cha DP.
Mbunge wa Vunjo, Aloyce Kimaro, alitembelewa na ambao ni wenyeviti na makatibu wa Kata wa CCM, wakiongozwa na Katibu wa Siasa na Uenezi, Wilaya ya Moshi Vijijini, Hussein Jamal.
Anna Abdallah (Viti maalumu-CCM), alitembelewa na wasanii wapatao 20 wa Kikundi cha Curser Film Production kilichokuwa kikiongozwa na viongozi watano; Mlezi wa Kikundi Mwanate Abdallah, Kiongozi wa Kikundi Charles Magari, Mwongozaji wa Filamu Bahati Tundu, Mkurugenzi wa Kikundi Hussein Mwala, na Katibu wa Kikundi Kuruthum Juma.
Dk Haji Mwita (Muyuni-CCM) Haji alitembelewa na viongozi wa CCM jimboni kwake ambao ni Katibu mwenezi, Ali Miraji Hassan, Katibu Fedha na Uchumi, Makame Mwadini Makame, Katibu wa Kata Wazazi Kibigija Juma, Mwenyekiti wa CCM, Tawi la Jozani Chumu.
James Lembeli (Kahama,CCM) alitembelewa na Mwenyekiti wa Mamlaka ya Mji mdogo wa Kahama, Jumanne Mayunga, diwani wa kata Kahama Mjini, Furaha Kagoro, diwani wa Kata ya Nyandekwa Hassan Mponya, mjumbe wa Kamati ya Siasa ya Kata ya Ulowa Robert Mdula.
William Shellukindo (Bumbuli,CCM) alitembelewa na Katibu wa Itikadi, Siasa na Uenezi wa CCM Wilaya ya Lushoto, Paul Twakyondo na wakati huo huo, Zungu naye akatembelewa na wanafunzi 25 kutoka Sekondari ya Azania ya jijini Dar es Salaam wakiongozwa na mwalimu Abdul Mohamed pamoja na Katibu CCM Kata ya Upanga, Khamis Kundya.