Mkurugenzi Mtendaji wa Kituo cha Ubia (PPPC), Bwana David Kafulila, amesema sekta binafsi au ubia kati ya Serikali na sekta binafsi hujitokeza katika eneo ambalo kuna makutano ya maslahi kati ya sekta ya umma na sekta binafsi.
Amesema kwa upande wa sekta binafsi, lengo kubwa ni kuongeza faida (profit maximization) kwa kuendesha shughuli zake kwa misingi ya biashara na uchumi.
Hata hivyo, si kila mradi una umuhimu kwa jamii unaweza kuendeshwa kwa misingi ya kibiashara, kwa sababu wakati mwingine idadi ya watumiaji au walipaji huwa ndogo kiasi kwamba mradi hauwezi kujilipa kibiashara.
Kwa hiyo, amesema eneo linalofanya ubia kati ya Serikali na sekta binafsi uwezekane ni pale ambapo mradi unaweza kulipa kibiashara, lakini wakati huo huo Serikali inaona mradi huo kuwa muhimu kiuchumi au kwa maendeleo na ustawi wa wananchi.
Kafulila amesema katika mazingira hayo, Serikali inapaswa kuacha shughuli ambazo zina mvuto wa kibiashara zifanywe na sekta binafsi, ili Serikali iweze kuelekeza rasilimali zake kwenye maeneo mengine yenye umuhimu mkubwa kwa ustawi wa jamii ambayo sekta binafsi haiwezi kuyafanya kwa sababu hayana faida ya kutosha kibiashara.
Amesisitiza kuwa kwa kufanya hivyo, Serikali inaweza kutumia rasilimali zake kwa ufanisi zaidi, huku ikishirikisha sekta binafsi katika maeneo ambayo yanaweza kuendeshwa kibiashara na kuleta uwekezaji, ajira na maendeleo kwa wananchi.