sasa nimekufahamu, kushukuru sina budi
maneno yako matamu, yanukia kama udi
mrembo mwenye nidhamu, tena huna ukaidi
nakuombea kwa mola, wepesi akufanyie
mimi siwezi gombea, ninae wangu pembeni
lakini ninatambua, atokupata kawini
katika hii dunia , zimeadimika himeni
nakuombea kwa mola, wepesi akufanyie
mengi umeyasema , ya msingi na maana
lakini pia tazama , tabia muhimu sana
usije potea zama, mitego ni mingi sana
nakuombea kwa mola,wepesi akufanyie
mwema hutoka mbinguni,wahenga wanatwambia
usali kwa yako dini , miezi iliobakia
umpate mwandani , asije kubadilikia
nakuombea kwa mola, wepesi akufanyie
kaditamati wa tama, beti zimeniishia
nadhani niliyosema, akilini yanaingia
kama pumba nimetema, msamaha nipatia
nakuombea kwa mola, wepesi akufanyie
klorokwini wanikuna, shairi ulonimbia,
hiyana kwako hakuna, dua umeniombea,
kumbe si dawa ya homa, bali ya raha kutia,
ya kwako yamenichoma, yote nitazingatia,
hata mie naombea,aliye mwema nipate,
sana mesubiria, sasa kiu nikate,
watoto nakimbilia, kwa raha niwapakate,
ya kwako yamenichoma, yote nitazingatia,
najua ipo mitego, yanasa hata vigori,
yang'oa hata magego, yachoma kama mbigiri,
mie taipa kisogo, japo sinacho kiburi,
ya kwako yamenichoma, yote nitazingatia,
Mungu nimemtumai, anipe raha milele,
ndoa nisijekinai, kama wazazi wa kale,
nisijetenda jinai, kiburi kuweka mbele
ya kwako yamenichoma, yote nitazingatia,
usia wako mwanana, lako neno maridhawa,
umeuleta kwa vina, hekima bure wagawa,
mie naupaka hina, kiwe cha wengi kipawa,
ya kwako yamenichoma, yote nitazingatia,