Setfree
JF-Expert Member
- Dec 25, 2024
- 6,238
- 8,194
Watu wengi wamepoteza furaha maishani mwao kwa sababu mbalimbali za kimaisha. Kama na wewe huna furaha, furaha yako inaweza kurejea ukifanya mambo yafuatayo:
- Kuna aliyekukosea? Usimchukie, msamehe – Chuki huiba furaha, lakini msamaha huleta amani.
- Kuna jambo limeishaharibika? Acha kulalamika – Acha kulalamikia mambo yasiyoweza kubadilika. Malalamiko huongeza huzuni.
- Mshahara hautoshi? Jifunze kuridhika – Kukubali hali uliyo nayo huondoa msongo wa mawazo.
- Watu wamekuvunja moyo? Kaa na watu wanaokutia moyo – Marafiki wazuri huongeza furaha maishani.
- Tenga muda wa kukaa na familia yako – Kukaa na familia ni baraka na chanzo cha furaha.
- Fanya mazoezi ya mwili – Mwili wenye afya nzuri unachochea akili yenye furaha.
- Una chakula au nguo za ziada? Wasaidie wenye mahitaji – Mtu anayewasaidia maskini au wajane hupata furaha zaidi.
- Uliosoma nao wana nyumba na magari lakini wewe huna? Acha kujilinganisha na wengine – Furahia baraka ulizo nazo badala ya kutamani za wengine. Kwa wakati uliokubalika na wewe utayapata hayo.
- Ukitukanwa, cheka! Usikasirike wala usinune – Kicheko huondoa msongo wa mawazo.
- Kuna mambo hayakuenda vizuri huko nyuma? Sahau mabaya ya zamani – Usiruhusu yaliyopita “yakunyonge.”
- Jitahidi kuwa na upendo kwa wengine – Kuwapenda wengine huleta furaha.
- Soma Biblia, utashangaa ukianza kuisoma – Ina maneno mengi ya faraja na yenye kutia moyo.
- Mueleze Mungu hitaji lako – Watu wanadharau maombi, lakini ukweli ni kwamba Mungu anasikia na kujibu maombi. Mimi, Mungu amenipa vitu vingi baada ya kumuomba.
Yesu anasema: "Hata sasa hamjaomba jambo lolote kwa Jina langu. Ombeni nanyi mtapewa, ili furaha yenu ipate kuwa kamili"(Yohana 16:24). - Unasikitika kwa kuwa unachelewa kufikia lengo lako? – Mshukuru Mungu kwa kila jambo (1 Thes 5:18). Furahia kila hatua unayopiga kikazi au kibiashara. Usihuzunike kwakuwa unakawia kufika kileleni, utafika!
- Epuka kufanya dhambi – Dhambi huleta dhamiri mbaya na kukufanya ujisikie una hatia; lakini utakatifu huleta amani na furaha. Ukitubu dhambi na kumwamini Yesu, kisha ukaendelea kuishi maisha matakatifu, siku inakuja utaingia mbinguni kwenye furaha na raha ya milele!