KATIBA: Tulipokosea tangu awali!

Manyerere Jackton · 2014-04-09T06:56:54+00:00

Wadau, Inasikitisha, lakini ndiyo ukweli wenyewe kwamba tangu awali mchakato wa Katiba ulikosewa. Ulikosewa tangu pale Rais Kikwete alipotangaza rasmi kuanza kwa shughuli hiyo kwa shinikizo tu bila maandalizi. Matokeo ya makosa hayo ndiyo haya kuvunjika na pengine kusambaratika kwa Tanzania. Kosa la kwanza lilikuwa kuwaacha Zanzibar, hasa kina Seif Sharrif na wafuasi wake watiifu kama kina Jussa, wafanye wanavyotaka! Wakawekana kitako na Rais Amani Karume, na kisha kuja na Katiba iliyovurunda misingi ya Muungano. Si Rais Kikwete (aliyeapa kuilinda Katiba ya JMT) wala wazee mashuhuri katika Taifa letu waliojitokeza kukemea jambo hilo. Hawakufanya hivyo ilhali wakijua kilichofanywa na Zanzibar kilikuwa kitendo cha uhaini. Nakumbuka Rais Kikwete wakati fulani alipoulizwa na waandishi wa habari kuhusu Katiba mpya ya Zanzibar, alijibu, Kuna ubaya gani kama imemaliza tofauti zao. Yote hayo yangeweza kusamehewa. Lakini kosa baya zaidi likawa mchakato wa Katiba kutangazwa na kuanza bila kwanza kuwashirikisha Watanzania (Bara na Visiwani) katika kura ya maoni. Kama ingeitishwa, maswali haya yafutayo yalikuwa muhimu: Mosi, wangapi mnautaka Muungano? Pili, kama mnautaka, Muungano huo uwe wa muundo/aina gani? Jambo la tatu lilikuwa kama Muungano hautakiwi, basi biashara yote ingeishia hapo. Tusingefuja mabilioni ya shilingi kwa kazi isiyokuwa na tija kwa wananchi. Baada ya kupata jibu la aina ya Muungano ambao wananchi wanautaka, hapo ndipo tungeandaa rasimu tukijua tunataka muundo wa Muungano wa aina gani. Hapo wananchi walioshinda kwa aina ya Muungano wanaoutaka wangekuwa mbogo kupambana na wote wanaopinga mawazo ya wengi. Kama wangejitokeza wanaopinga mawazo ya wengi, wangesutwa. Tumefanya kosa kubwa sana kutoanza na referendum. Matokeo yake sasa tunabwayabwaya. Mtiririko wa kuibadili Katiba kwa njia hii ya sasa ni kuvunja Katiba yenyewe iliyopo, yaani hii ya mwaka 1977. Sisi tuliliona hilo siku nyingi na tukaandika kwa kujiamini kabisa kuwa KATIBA HAIANDIKIKI. Hili Bunge hata likiahirishwa hadi Agosti, hakuna mwafaka wowote utakaopatikana kwa sababu kila kundi lina mwelekeo wake ndani ya Bunge Maalum la Katiba. Wazanaki wana msemo huu, Wajanja wengi hawachomi nyama ikaiva. Hatujachelewa. Naomba turejee kwa wananchi ili tuwe na kura ya maoni ya aina ya Muungano tunaoutaka. Hiyo itatusaidia kuondokana na haya makundi ya wanaotaka Serikali Moja, Serikali Mbili na Serikali Tatu. Kwangu mimi, kudumu kwa TANZANIA ni jambo ninalomuomba Mola kila dakika. Nawasilisha

Thread starter Manyerere Jackton
Start date Apr 9, 2014

Manyerere Jackton

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

KATIBA: Tulipokosea tangu awali!

Manyerere Jackton

JF-Expert Member

Our Community

Regional Communities