Kikwete: Nyumba zilizouzwa maeneo nyeti zitarudishwa
Na Jacqueline Liana (source - uhuru la leo)
RAIS Jakaya Kikwete amesema baadhi ya nyumba za serikali zilizouzwa kwa maofisa wake wakati wa uongozi wa awamu ya tatu, zitarudishwa serikalini.
Alisema hayo jana alipokuwa akilihutubia Taifa katika utaratibu aliojiwekea wa kuzungumza na wananchi kila mwisho wa mwezi.
Jana alifanya hivyo Ikulu jijini Dar es Salaam katika tukio lililohudhuriwa na wahariri wa vyombo mbalimbali vya habari na baadaye Rais Kikwete kujibu maswali baada ya hotuba yake.
Alisema si nyumba zote zilizouzwa kwa watumishi hao wa serikali zitarudishwa serikalini, bali zilizopo katika maeneo ambayo yanasababisha hali isiyo kuwa ya kawaida katika utendaji kazi wa serikali.
"Nyumba hizi zimeuzwa, kwa kweli hatukusudii kuzichukua nyumba zote, lakini kuna maeneo tuna matatizo nayo," alisema Rais Kikwete.
Alitoa mfano wa hali hiyo kwa kusema kwamba utakuta nyumba ya kamanda wa polisi wa wilaya ameuziwa kamanda huyo na nyumba yenyewe iko ndani ya kituo cha polisi.
"OCD kauziwa nyumba ya OCD, eneo la kituo cha polisi... OCD yule kahama katoka Mafia kahamia Mtwara au kastaafu nyumba ile kapangisha, sasa yule aliyepangishwa pale kituoni... haya ni maeneo ambayo tunapaswa kuingilia kati," alisema Rais Kikwete na kusababisha kicheko miongoni mwa wahariri.
Rais alisisitiza kwamba, kitakachofanyika ni kuangalia maeneo yale ambayo serikali haina budi kuyafanyia marekebisho.
"Hili ndilo jambo kwa kweli sasa hivi tunalolishugulikia," alisema Rais Kikwete.
Akizungumzia mashirika yasiyo ya kiserikali, Rais Kikwete alisema baadhi ya NGO's zimeundwa kwa ajili ya kuwapatia watu ajira na si dhamira ya dhati ya kushughulikia makusudio ya kuanzishwa kwa taasisi husika.
Alisema alipokuwa Marekani katika moja ya mikutano, mmoja wa marais alitaka NGO's ziwe na uwazi wa kueleza pesa wanazopokea na miradi wanayoitekeleza.
Kuhusu wafanyabiashara ndogo ndogo maarufu 'machinga', Rais alisema anashukuru utaratibu wa kuwaondoa katika maeneo yasiyoruhusiwa, umefanyika kwa amani, na kuitaka halmashauri ya jiji la Dar es Salaam iendeleze maeneo waliyohamia wafanyabiashara hao.
"Viko viwango vya kufanya hizi shughuli na sisi tukiendelea kufanya hizi kazi katika mazingira ya udongo tutachelewa sana kufikia viwango vinavyotakiwa kimataifa," alisema Rais Kikwete.
Aliagiza Jiji kuhakikisha kuwa huduma muhimu kama vyoo na maji zinapatikana katika maeneo walikohamia machinga, hatua za kuwapa elimu ya biashara zichukuliwe ili wapatiwapo mikopo waitumie vyema.
"Maadam, sasa wametulia na wana anuani ni fursa ya kuangali na kutoa kipaumbele katika mafunzo ya kufanya biashara na mikopo, ili shughuli zao ziweze kukua ifikie siku ambayo mtu anatoka Mchikichini, anaanzisha duka lake," alisema Rais Kikwete.