Kwani Wanaume wa Tanzania Wana Nini? Mkenya Aeleza Kilichomfanya Aamini Tena Mapenzi

[Wakaguongo]

Mwanamke mmoja kutoka Kenya amezua mjadala mitandaoni baada ya kueleza jinsi uhusiano wake wa kimapenzi na mwanaume Mtanzania ulivyobadilisha mtazamo wake kuhusu mapenzi na mahusiano ya kuvuka mipaka ya nchi.

Katika video inayosambaa Instagram, mwanamke huyo anasema kwa miaka mingi alikuwa akijiuliza kwa nini wanawake wengi wa Tanzania wanaonekana kupendelea kuchumbiana na wanaume wa taifa lao badala ya wanaume kutoka nchi nyingine. Anasema hata Wakenya hawakuonekana kuwa miongoni mwa chaguo lao la kimapenzi.

Hata hivyo, anasema baada ya kukaribia kukata tamaa ya kupata mapenzi, alikutana na mwanaume Mtanzania ambaye kwa sasa yuko naye kwenye uhusiano. Uzoefu huo, anasema, umemfanya aanze tena kuamini katika mapenzi.

Miongoni mwa mambo aliyoyasifu kwa mwanaume huyo na wanaume wa Tanzania kwa ujumla ni kuthamini utamaduni, mapenzi na zaidi ya yote, uwezo wa kuwasiliana. Kwake, mawasiliano ni sehemu muhimu ya uhusiano, na anasema amevutiwa na namna mwanaume huyo anavyowasiliana naye.

Kauli zake zimefungua mjadala mpana kuhusu tofauti za kimahusiano, matarajio ya watu wanapoingia kwenye mapenzi na nafasi ya utamaduni katika kuchagua mwenza.

Lakini tuzungumze: Ni kweli kuna tofauti katika namna wanaume wa Kenya na Tanzania wanavyoendesha mahusiano ya kimapenzi?

Je, mawasiliano, kuheshimu utamaduni na kuonyesha mapenzi ni mambo ambayo unahisi yanatofautiana kati ya mataifa haya mawili, au yote yanategemea mtu binafsi badala ya uraia wake?

Na kwa wale waliowahi kuwa kwenye mahusiano ya kuvuka mipaka ya nchi, uzoefu wenu ulikuwaje?