Makamu wa Rais wa Tanzania, Deogratius Ndejembi, ameitaka Wizara ya Viwanda na Biashara kukaa meza moja na wazalishaji wa saruji nchini ili kuweka mikakati ya haraka itakayohakikisha bidhaa hiyo inapatikana kwa wingi na kurejea katika bei nafuu ya awali.
Ndejembi ametoa agizo hilo jana jijini Dar es Salaam wakati wa hafla ya utoaji wa Tuzo za Rais kwa Mzalishaji Bora Viwandani (President’s Manufacturer of the Year Awards - PMAYA), zinazoratibiwa na Shirikisho la Wenye Viwanda Tanzania (CTI).
Katika tuzo hizo, Kampuni ya SILAFRICA Tanzania Limited imeibuka mshindi wa kwanza wa jumla, ikifuatiwa na Alliance One kama mshindi wa pili, huku Tanzania Cigarette PLC ikitwaa ushindi wa tatu.
Akieleza kero ya wananchi kuhusu gharama za ujenzi, Makamu wa Rais amebainisha kuwa Watanzania wanalazimika kununua saruji kwa bei kubwa kutokana na usimamizi na uratibu dhaifu wa uzalishaji viwandani, jambo ambalo linaenda kinyume na maelekezo ya Rais Dkt. Samia Suluhu Hassan.
“Sasa nakuagiza Waziri wa Viwanda na Biashara namwona hapa Katibu Mkuu wa Wizara ya Viwanda, na Kamishna Mkuu wa Mamlaka ya Mapato Tanzania (TRA), kaeni pamoja mmalize hili suala ili Mtanzania apate saruji kwa bei iliyokuwepo. Nataka kupata ripoti ya suala hilo baada ya kikao hiki, mjadili na mwandike ripoti tumkabidhi Rais,” amesisitiza Ndejembi.
Akiangazia mwenendo wa uchumi, Makamu wa Rais ameeleza kuwa sekta ya viwanda imeendelea kukua, ambapo mwaka 2025 ilikua kwa asilimia 5.2 ikilinganishwa na asilimia 4.2 ya mwaka 2024, huku mchango wake katika Pato la Taifa ukifikia asilimia 5.9 na kuchangia takribani asilimia 12 ya ajira rasmi nchini.
Hata hivyo, ametoa rai kwa wamiliki wa viwanda kutojiridhisha na soko la ndani pekee, bali kuongeza ubora na tija ili bidhaa za Tanzania ziweze kushindana katika masoko ya Afrika Mashariki na duniani kote.
Kwa upande wake, Mkurugenzi Mkuu wa CTI, Leodegar Tenga, ameeleza kuwa tuzo za PMAYA zinalenga kutambua mchango wa sekta ya viwanda na kuchochea ubunifu. Pia amesisitiza utekelezaji wa misingi ya uzalishaji endelevu unaozingatia mazingira, jamii na utawala bora (ESG), akitangaza kuanzishwa kwa Mabalozi 10 wa ESG watakaopimwa kwa mwaka mmoja.