Aliyekuwa Waziri wa Mambo Ya Ndani, Fred Matiang’i, alihudhuria ibada katika kanisa la Jesus Is Alive Ministries (JIAM) jijini Nairobi jana Jumapili Oktoba 11, 2026 ambako Askofu Margaret Wanjiru alimpaka 'mafuta matakatifu' katika tukio lililovuta hisia za kisiasa kuelekea Uchaguzi Mkuu wa 2027. Ikumbukwe Matiang'i ni miongoni mwa Viongozi wa upinzani wanaotafuta uungwaji Mkono kugombea nafasi ya Urais dhidi ya Rais William Ruto.
Wanjiru, ambaye pia ni kiongozi wa Kenya Moja Movement, anawania kiti cha Ugavana wa Nairobi na analenga kumng’oa Gavana Johnson Sakaja katika uchaguzi ujao. Katika ibada hiyo ya Jumapili, Matiang’i alitangaza kuwa Chama cha Jubilee Party kitamuunga mkono Wanjiru katika azma yake ya kuongoza Kaunti ya Nairobi. Ahadi hiyo inaongeza mwelekeo mpya katika ushirikiano wa kisiasa kati ya viongozi hao wawili.
Kanisa na Siasa za 2027.
Ziara hiyo inakuja wakati ambapo wanasiasa wanaendelea kutafuta washirika na kujenga mitandao ya kisiasa kabla ya uchaguzi wa 2027. Kwa Wanjiru, uungwaji mkono kutoka kwa kiongozi wa Jubilee unaweza kuwa sehemu ya juhudi zake za kupanua ushawishi wake katika siasa za Nairobi.
Hata hivyo, tukio hili limeibua maswali mapana kuhusu nafasi ya taasisi za kidini katika siasa za Kenya. Makanisa yamekuwa maeneo muhimu ya mikutano ya viongozi na wananchi, lakini kadri uchaguzi unavyokaribia, ni muhimu kutofautisha ibada, ushirikiano wa kijamii na kampeni za kisiasa.
Kwa mwanachi wa kawaida, swali muhimu ni jinsi miungano hii itakavyotafsiriwa katika sera na mipango ya maendeleo ya kaunti, ikiwemo usimamizi wa fedha za umma, huduma za afya, usafi, usafiri na gharama ya maisha.
Ni kitu gani kilikujia akilini ulipomuona Matiang'i akipakwa mafuta na Margaret Wanjiru? Na Je, kumuunga mkono Margaret Wanjiru baada ya kumtembelea kanisani ni ishara ya ushirikiano wa kisiasa unaoweza kubadili ushindani wa ugavana Nairobi, au wapiga kura wanapaswa kutenganisha kabisa mahusiano ya kanisani na maamuzi yao ya uchaguzi?