Ndugu wanajamii na mamlaka husika,
Huu ni uendeshaji hatari sana wa chombo cha moto na ni jambo ambalo halipaswi kuachwa liendelee kuwa kawaida.
Kama inavyoonekana kwenye video, dereva wa bajaji hii amejaza abiria kupita kiasi hadi amekosa kabisa nafasi ya kawaida ya kukaa. Ili kuweza kuendesha, amelazimika kutoa sehemu ya mwili wake nje na wakati mwingine hata mguu nje huku chombo kikiwa kwenye mwendo. Hii ni hatari kwa dereva mwenyewe, abiria, pamoja na watumiaji wengine wa barabara.
Hata hivyo, ni muhimu pia kuangalia mazingira yaliyosababisha hali hii. Kwa kiasi kikubwa, hali ya leo imechangiwa na mgomo wa daladala Mbeya, ambao umewalazimu abiria wengi kuhamia kwenye bajaji na kusababisha msongamano mkubwa na usafiri wa bajaji kulemewa. Kwa hiyo, mazingira ya leo yalikuwa tofauti na siku za kawaida.
Pamoja na hilo, mgomo hauondoi kabisa wajibu wa dereva. Uamuzi wa kubeba abiria kupita uwezo wa bajaji na kuendesha akiwa katika hali hiyo ni hatari na dereva anapaswa kutambua madhara yanayoweza kutokea. Tatizo ni kwamba, kwa bahati mbaya, aina hii ya uendeshaji imekuwa ikionekana pia siku nyingine, hasa nyakati za asubuhi na jioni wakati wa misongamano mikubwa.
Lengo la kuleta video hii hapa jukwaani siyo kutaka dereva huyu apewe adhabu kali iliyopitiliza au kupoteza kabisa chanzo chake cha riziki. Ni muhimu mamlaka zitazame suala hili kwa mtazamo mpana, kwa sababu mara nyingi madereva hawa wanafanya kazi katika mazingira yenye presha kubwa ya kutafuta hesabu za kila siku.
Rai yangu kwa mamlaka husika, ikiwemo Kikosi cha Usalama Barabarani na LATRA, ni:
1. Kutatua changamoto ya usafiri wa daladala
Mgomo wa daladala unapunguza kwa kiasi kikubwa uwezo wa usafiri wa umma na kuwalazimisha abiria wengi kutegemea bajaji. Hali hii inapozidi, huongeza msongamano na kuwaweka madereva wa bajaji kwenye presha kubwa ya kubeba abiria wengi zaidi. Ni muhimu chanzo cha tatizo la usafiri kishughulikiwe ili kupunguza mzigo huu.
2. Kutoa elimu na tahadhari kwa madereva
Dereva huyu na wengine wenye tabia kama hii wapewe elimu na tahadhari kuhusu madhara ya kubeba abiria kupita uwezo wa chombo. Onyo la wazi litolewe kwa madereva wote kwamba hata katika mazingira ya msongamano au upungufu wa usafiri, usalama haupaswi kuachwa nyuma.
3. Hatua iwe ya kumrekebisha, siyo kumwangamiza
Ikiwa mamlaka itaona ni lazima hatua ichukuliwe dhidi ya dereva huyu, naomba izingatie adhabu inayolingana na kosa, kama vile faini na elimu ya usalama barabarani, badala ya hatua inayoweza kumkatisha kabisa riziki. Hii siyo kumtetea dereva kwa alichofanya, bali ni kuomba hatua inayomfundisha na kurekebisha tabia bila kumwangamiza.
4. Kuangalia presha ya hesabu kwa madereva
Madereva wengi wanaoendesha bajaji kwa mikataba wanakuwa na presha kubwa ya kufikisha hesabu za kila siku. Presha hii inaweza kuwafanya baadhi yao kuchukua risks barabarani ili kuongeza mapato. Ni muhimu mamlaka na wahusika katika sekta hii kuangalia kama kuna namna ya kuweka utaratibu wa mikataba unaopunguza presha hiyo bila kuathiri usalama.
5. Kudhibiti uendeshaji wa bajaji na madereva wasio rasmi
Kuwe na utaratibu mzuri wa kuhakikisha bajaji haiendeshwi na mtu mwingine kiholela wakati dereva wake amechoka au anahitaji kupumzika. Kuna maeneo, hasa kwenye vituo vya kupigia debe, ambapo dereva anaweza kumpa mtu mwingine bajaji aendeshe kwa muda, hata kama siyo dereva rasmi wa chombo hicho. Hali hii inaweza kuongeza hatari kwa sababu dereva mwingine anaweza kuwa hana uzoefu, hana taarifa sahihi za chombo au akawa anakimbizana na muda.
Ni matumaini yangu kuwa mamlaka zitaangalia suala hili kwa mtazamo wa usalama lakini pia kwa kuzingatia mazingira halisi ambayo madereva na abiria wanakutana nayo.
Dereva huyu amekosea na anapaswa kuwajibika kwa kiwango kinachostahili, lakini pia tusisahau kwamba mazingira ya usafiri, mgomo wa daladala, msongamano na presha za kiuchumi vina mchango katika kuzalisha tabia hizi.
Credit: alierekodi na kushea video hio na kuisambaza kwenye magroup