Mbunge wa Jimbo la Kibaha Mjini, Sylvestry Koka, amewataka walimu kuchagua viongozi wenye uwezo wa kuwapambania na kudai maslahi yao badala ya kujihusisha na harakati zisizokuwa na tija kwa maendeleo yao.
Koka ametoa kauli hiyo alipokuwa akifungua Mkutano Mkuu wa Uchaguzi wa Chama cha Walimu Tanzania (CWT) Wilaya ya Kibaha, uliofanyika mjini Kibaha.
"Chama cha Walimu Tanzania ni miongoni mwa vyama vya wafanyakazi vyenye wanachama wengi. Walimu wanapaswa kuchagua viongozi watakaowasaidia katika kudai haki zao na kujenga mshikamano, badala ya kujihusisha na mambo yasiyowasaidia," amesema Koka.
Katika hotuba yake, Koka amesema kuwa katika kipindi cha miaka mitano iliyopita, asilimia 89.79 ya fedha za Mfuko wa Jimbo zimetumika kuboresha sekta ya elimu.
"Tumeendelea kuwekeza katika elimu kwa kujenga madarasa, kuboresha miundombinu ya shule na kusaidia masuala mbalimbali ya walimu. Serikali itaendelea kuhakikisha walimu wanapata mazingira bora ya kufanyia kazi," amesema Mbunge huyo.
Kwa upande wake, Katibu wa CWT Mkoa wa Pwani, Susan Shesha, amesema kuwa chaguzi za viongozi wa CWT zinazoendelea katika mkoa huo zimefanyika kwa uwazi na demokrasia imetawala.
"Tuna matumaini kuwa viongozi watakaopatikana watakuwa mstari wa mbele kutetea haki za walimu na kushirikiana na serikali katika kutatua changamoto zilizopo," amesema Shesha.
Ameongeza kuwa mshikamano wa walimu ndani ya chama ni muhimu kwa mustakabali wa elimu nchini na maendeleo ya taaluma ya ualimu.
Changamoto Zinazoikabili Sekta ya Ualimu
eria
Katibu wa CWT Wilaya ya Kibaha, Jane Shoo, ameishukuru serikali kwa juhudi zake katika kuboresha mazingira ya kazi kwa walimu, ikiwa ni pamoja na kupandisha madaraja ya walimu na kuongeza mishahara.
Hata hivyo, ameainisha changamoto kadhaa ambazo bado zinawakabili walimu, ikiwemo:
Kasi ndogo ya ulipaji wa stahiki za walimu, kama vile malipo ya likizo na malimbikizo ya mishahara.
Uhamisho wa walimu kuchelewa, hali inayosababisha malimbikizo ya madeni ya serikali kwa walimu wanaohitaji kuhamishwa.
Shoo ametoa wito kwa serikali kuongeza kasi ya kutatua changamoto hizo ili kuhakikisha walimu wanafanya kazi katika mazingira bora na yenye motisha.
Source: Nipashe