Mkurugenzi wa Mawasiliano na Uenezi wa Chama cha Ukombozi wa Umma (CHAUMMA), John Mrema, amemtaka Katibu Mkuu wa Chama cha Demokrasia na Maendeleo (CHADEMA), John Mnyika kueleza ukweli kuhusu kilichotokea kwenye akaunti za chama hicho za Instagram, X na YouTube, akimtuhumu kunufaika na propaganda zinazomhusisha yeye na uuzaji wa akaunti hizo.
Mrema ametoa kauli hiyo baada ya sakata la akaunti hizo kuibuka tena katika mitandao ya kijamii, kufuatia madai yaliyotolewa na mwanachama wa CHADEMA, Hilda Newton, yaliyomhusisha Mrema na uuzaji wa akaunti za Chadema.
Akijibu madai hayo, Mrema amekanusha kuhusika na uuzaji wa akaunti za CHADEMA, akisisitiza kuwa hakuwahi kuwa na nywila (password) za akaunti hizo wakati alipokuwa Mkurugenzi wa mawasiliano wa Chadema.
Kwa mujibu wa Mrema, wakati wa uendeshaji wa akaunti hizo, nywila zilikuwa kwa Katibu Mkuu wa CHADEMA, John Mnyika, pamoja na vijana waliokuwa wakihusika na idara ya mawasiliano, akiwataja Appolo na Kareem.
Mrema amemtaka Mnyika kujitokeza na kueleza hadharani ukweli kuhusu akaunti hizo, akisema Katibu Mkuu huyo anaujua ukweli wa kilichotokea, lakini amekuwa kimya kwa sababu, kwa madai yanayoelekezwa kwa Mrema, anaendelea kunufaika na propaganda zinazomhusisha yeye.
“Mnyika anaujua ukweli wote ila kwa sababu uongo huu unamnufaisha hataki kujitokeza na kusema ukweli,” Mrema amesema.
Mrema amesema pia aliwahi kumuandikia Mnyika barua akimtaka kueleza ukweli kuhusu suala hilo, lakini anadai hakupata majibu aliyoyatarajia.
Amesisitiza kuwa hana tatizo na uchunguzi wa suala hilo, akiwataka wanaomtuhumu kuwasilisha ushahidi wa madai kwamba alihusika kuuza au kuchukua akaunti hizo.
Mrema amesema endapo tuhuma hizo zitaendelea, yuko tayari kuweka hadharani ushahidi anaodai kuwa anao kuhusu waliokuwa na nywila za akaunti hizo na namna zilivyokuwa zikisimamiwa.
Sakata hilo linahusu akaunti za Instagram, X na YouTube zilizokuwa zikitumika kama majukwaa rasmi ya CHADEMA katika kutoa taarifa, kueneza ujumbe wa chama na kufikisha shughuli zake kwa umma.
Kwa sasa, Mrema anataka mjadala huo usielekezwe kwake bila ushahidi, bali Mnyika aeleze ukweli kuhusu akaunti hizo na kilichotokea huku akimtuhumu Katibu Mkuu huyo kunufaika na propaganda zinazoendelea kumhusisha na suala hilo.