Mwanamke wa sasa!

Bazazi · 2012-10-05T16:17:13+00:00

Wazo letu la sasa juu ya wanawake ni kuwa mtaalamu, mtemedeni, mrembo na maridadi. Hukaidi ukubwa na utawala wa mwanaume katika mambo yote ya maisha. Hushindana na mwanaume kwa ajili ya uhuru wa maslahi na uchumi. Kinyume cha mwanamke wa zamani aliyekuwa mtumwa na mtumishi wa kazi ngumu kama kibarua. Mwanamke wa zamani alionekana mchana na usiku nyumbani na jikoni, kuzaa na kulea umati wa watoto, na mwenye lazima ya kufanya kazi ya kuangalia faraja ya bwana: mume wake. Walakini mambo yamebadilika sasa. Kazi ya mwanamke sio utii. Hutaka usawa wa cheo na wa haki. Mwanamke wa sasa ni asi. Si vibaya kwa kadri mambo yaendeleavyo, lakini kujichukulia kibubusa – kama kipofu – kila litendwalo na mwanaume ili kuonyesha ulimwengu kuwa ana usawa ni upuzi pengine. Wanawake wameanza kuvuta sigara kwa sababu wanaume wanavuta. Huvaa suruali na mashati kwa sababu wanaume huvaa. Matokeo yake ni fujo kubwa. Hujui nani mwanaume au nani mwanamke! Mipaka ya nguvu za mwanamke, hali hafifu, kuchoka upesi na moyo dhaifu humfanya hafai kwa kazi ngumu. Mwanamke ni malaika wa roho. Na apate usawa wa haki na wa cheo, lakini daraka lake katika maisha ni la Mapenzi, Huruma, Sanaa na hifadhi. NB mtemedeni = aliyestaarabika, aliyeendelea asi = kutotii kibubusa = kipumbavu, kipofu, kama kipofu. Shaaban Robert (1967). Diwani ya Shaaban 5: Insha na Mashairi. Thomas Nelson and Sons Ltd. Dar es Salaam. 105pp.

Thread starter Bazazi
Start date Oct 5, 2012