- Source #1
- View Source #1
Wakuu nimekutana na huyu bibie anajaribu kufafanua kuwa wanaume wanaofanya ngono mara kwa mara wapo kwenye hatari kubwa ya kupata Tezi Dume, hii uhalisia umekaaje?
- Tunachokijua
- Hakuna ushahidi kwamba kufanya mapenzi au kufika kileleni mara kwa mara husababisha kuongezeka kwa tezi dume (Benign Prostatic Hyperplasia - BPH) au saratani ya tezi dume. Na hakuna sababu ya kuepuka ngono kwa hofu hiyo.
Muhimu zaidi ni kufahamu dalili za mabadiliko ya mfumo wa mkojo na kujadili afya ya tezi dume na mtoa huduma wa afya kadiri umri na vihatarishi vinavyoongezeka.
Baadhi ya tafiti zimeonyesha kuwa wanaume wanaoripoti kumwaga manii mara kwa mara wanaweza kuwa na hatari ndogo ya kupata saratani ya tezi dume, ingawa ushahidi huu haujathibitisha moja kwa moja kwamba kufanya mapenzi au kufika kileleni mara kwa mara huzuia saratani.
Kwa mfano, utafiti mkubwa wa wanaume zaidi ya 31,000 uliona kiwango cha chini cha saratani ya tezi dume miongoni mwa wanaume walioripoti kumwaga manii mara kwa mara. (PubMed)
Kihatarishi kikubwa zaidi cha saratani ya tezi dume ni umri. Hatari huongezeka kadiri mwanaume anavyozeeka. Historia ya familia ya saratani ya tezi dume pamoja na uwepo wa vinasaba (genes) vya saratani pia huongeza hatari.
Wanaume wenye asili ya Kiafrika wana hatari kubwa zaidi ya kupata saratani ya tezi dume kuliko baadhi ya makundi mengine. (Cancer.gov). Uvutaji sigara pia umehusishwa na saratani ya tezi dume, hasa kwa upande wa ugonjwa mkali (advanced stage) na hatari ya kufariki kutokana na saratani.
Ni muhimu kuzungumza na mtoa huduma wa afya kuhusu uchunguzi wa saratani ya tezi dume, ambao unaweza kuhusisha kipimo cha damu cha PSA (Prostate-Specific Antigen) na, inapofaa, uchunguzi mwingine. Uchunguzi unapaswa kuzingatia umri, historia ya familia, asili ya kinasaba na faida pamoja na madhara yanayoweza kutokea kutokana na uchunguzi. (USPSTF)
