Habari JamiiForums, naleta kwenu malalamiko yangu labda wakiyaona kutokea hapa ni
Mimi ni mpiga picha, nimejiajiri kwenye kizi hii na ndio inayoniingizia kipato. Sasa nilikuwa nimeweka camera yangu sokoni ili niongezee na kiasi kingine ninunue kamera nyingine itakayonifaa zaidi kwenye kazi zangu, kamera yangu ilikuwa na thamani ya Tsh. Milioni 2 aina ya Nikon D610 pamoja na lenzi ya Nikkor 50mm f1.8.
Tar 10 June 2024 nilipigiwa simu na mteja aliyejitambulisha kwa jina moja la Chris, alinipigia simu asubuhi kwenye saa tano akaniambia anataka kununua Camera. Akasema nifanye delivery maeneo ya Tabata Segerea, karibu na sheli ya Oil Com. Nilipofika maeneo hayo ilibidi nichukue bodaboda mpaka mahali alipokuwa ananisubiri, akanipatia hela ya kumlipa boda (aliniambia nichukue boda atamlipa). Sikumuacha bodaboda aondoke nilitaka baada ya kumalizana na mteja niondoke naye.
Nikamuonyesha camera akaikagua, kulikuwa na kibanda cha Airtel Money karibu na hapo, akasema aliyekuwa hapo ni dada yake anataka amuoneshe kamera. Sikushtuka maana ilikuwa jirani, baada ya kumuonesha na kuongea maneno mawili matatu akasema kamera iko sawa na ameridhika nayo. Sasa ikabaki kufanya malipo, akaniambia pesa iko nyumbani kwake, ambako si mbali na hapo, hivyo twende akamalishe malipo.
Basi tukapanda wote ile boda boda tukaenda, tukafika kwenye nyumba ambayo si mbali na hapo akaingia ndani akisema anaenda kunifatia pesa. baada ya yeye kuingia ndani nikaanza kujisikia vibaya, kama vile naishiwa nguvu na kuwa kama naona mawingu (blur). Karibu yangu alikuepo bodaboda tuliyekuja naye pamoja na dada mwingine pembeni ambao baada ya kuniona katika hali hiyo walianza kunisaidia.
Baada ya muda nilikaa sawa, lakini muda wote huo yule kaka hakuwa ametoka nje, nikampigia simu hapatikani, kuulizia kwenye nyumba hiyo aliyoingia nako wakasema hawajamuona. Hapa ndio nikashtuka kuwa nimeibiwa. Kwa kufikiria haraka haraka nilihisi hela niliyopewa ilikuwa na aina ya madawa ya kulevya yaliyonifanya nipoteze fahamu. Kwakweli nilichanganyikiwa sana nikapanda gari na kurudi nyumbani mbweni, sikufikiria hata kwenda polisi.
Nilipofika nyumbani baada ya kupumzika na kuendelea kujisikia vizuri kiasi ndio akili ikarejea kuwa sikukwenda polisi, nikaenda kwenye kituo karibu na eneo ninaloishi wakaniambia nirudi kwenye kituo cha Tabata ambako niliibiwa. Muda ulikuwa umeshaenda, ikabidi niende kesho yake.
Kesho yake nikaenda toa taarifa polisi kituo cha Stakishali kipo Tabata Segerea. Nikapewa RB na namba ya mpelelezi lakini niliambiwa kuna machaguo mawili, la kwanza ni kuandika barua halafu unasubiri kupewa mpelelezi ambayo kwa maoni yao haifanyi inachukua muda mrefu na haifanyi kazi, na option ya pili ni kutoa elfu 60 kumpatia mpelelezi ambako hapa ndio mambo yataenda fasta fasta, yaani nitoe cha juu. Wkaniambia nikiwa tayari niende na elf 60 ndio kazi ianze. Kwakweli hiyo hela sikuwa nayo, ukizingatia nilikuwa nimeenda kuuza kamera Nikiwa teyari niwacheki
Nikauliza baadhi ya watu ninaowafahamu, imekuaje ninadaiwa pesa ya upelelezi wakati najua huduma hii ni bure, nikaambiwa ndivyo ilivyo tena mpaka nauli ya mpelelezi na pesa ya vocha unatakiwa umlipe ili afanyie kazi kesi yako. Basi wakati wanaendelea kutafakari cha kufanya nikaamua kurudi maeneo yale ambako niilibiwa, kufika pale nilikutana na yule dada aliyenisaidia jana yake nikamuuliza kuhusu yule kaka, kama ni mwenyeji maeneo yale na kumpa picha yake ambayo niliitoa kwenye page yake ya instagram, jina la instagram alikuwa anatumia Hamis_boy (sasa hivi amefuta account yake).
Yule dada aliniambia sura yake si ngeni, ila nimuachie namba yangu atatuma picha kwa rafiki zake anisaidie kuuliza, aliwatumia marafiki zake wakati niko njiani kurudi nyumbani akanipigia simu na kusema baadhi ya marafiki zake walimtambua na kusema anaishi Tabata Kinyerezi, ni mtu ambaye wamezoea kumuona hasa maeneo ya baa.
Sasa juzi nimepigia simu na yule dada nilimuachia namba, kuwa yule kaka kamtapeli mtu mwingine simu yenye thamani ya Tsh. laki 5 maeneo yale yale niliyoibiwa mimi. Inavyoonekana ndio michezo yake na itakuwa amaeshawatapeli wengi.
Sasa kama mimi ambaye sina utaalamu nimeweza kugundua hayo, naamini polisi wangeweza kumdaka ndani ya siku moja au mbili kuepusha watu wengine kufanyiwa utapeli na huenda ningepata kamera yangu, lakini mpaka utoe pesa ndio unapata huduma. Ina maana mtu usipokuwa na uwezo ndio hustahili kupata haki?
Mpaka kufikia hapa nimekata tamaa ya kuipata kamera yangu (ikipatikana nitashukuru Mungu) lakini naamini polisi wale wanaweza kuwajibishwa kwa tabia zao za kutengeza mazingira ya kuchua rushwa na kutia doa jeshi la polisi, na pia itasaidia mtu mwingine asije kuwa muhanga wa mwizi yule.
Kupitia nyie najua haitazidi siku moja yule mwizi atakuwa ametiwa nguvuni kama watakuwa hawajamchoma moto, maana yule dada alisema ikitokea amemuona tena anataka kumtapeli mtu mwingine atamuitia mwizi. Mnaona jinsi baadhi ya polisi wanasababisha wananchi wajichukulie sheria mkononi, maana tukienda polisi hali ndio kama hii.
Asanteni.
Naambatanisha picha ya jamaa aliyenitapeli ambayo niliipata kwenye page yake Instagram, screenshot inayoonesha namba yake, pamoja na RB niliyokata.
