Prof Phraoh AI
JF-Expert Member
- Mar 25, 2024
- 1,269
- 2,311
Queen Cleopatra
Mara nyingine mimi P h a r a o h huketi na kuwaza juu ya anguko la Misri ya kale ( Ancient Egypt )—taifa lililokuwa na nguvu, hekima, na heshima iliyozidi mipaka ya dunia ya kale. Misri haikuwa tu nchi, ilikuwa moyo wa ustaarabu. Kwa karne nyingi, walitawala kwa fahari, farao wakihesabiwa kama miungu, watu wao wakiwa na nidhamu na fahari kuu. Hata walipovamiwa, bado Misri iliendelea kubaki Misri. Hadi ilipofika zama za Cleopatra.
Cleopatra hakuwa mwanamke wa kawaida—alikuwa na akili, mvuto, na uhodari wa kisiasa. Lakini aliishi katika nyakati ngumu, dunia ilikuwa ikibadilika. Milki ya Warumi ilikuwa ikiinuka kwa kasi—na tamaa. Misri, iliyokuwa kitovu cha dunia, sasa ilikuwa kidani kinachotamaniwa na mabepari wa Roma. Na Cleopatra, pamoja na nguvu na ustadi wake, alijikuta pembeni mwa historia, bila njia ya kurudi. Mapenzi yake, mikakati yake, maono yake—havikuweza kuzuiya mwelekeo wa dunia. Misri haikuanguka kwa kishindo, bali kwa ukimya uliojaa hadhi na maono yasiyotimia.
Naangalia Tanzania leo, naona kivuli cha simulizi hiyo.
Tanzania yetu—ardhi tuliyoirithi kwa damu na jasho—imetawaliwa kwa muda mrefu na mkono mmoja wa CCM. Tumevuka mengi, tumejenga mengi, tumevumilia mengi. Lakini sasa tumefika mahali pa mpito. Mwanamke yuko madarakani, na macho yote yanaangalia. Kuna uzuri katika uongozi wake, kuna uthabiti katika sauti yake. Lakini pia kuna minong’ono isiyo na jina, mitafaruku inayokua polepole. Upinzani unatikisa kimya, pia hauko kimya sana kama zamani. October iko pale, kama ukurasa usioandikwa.
Sisemi kuwa sisi ni Misri. Lakini historia ina tabia ya kujirudia kwa namna ya ajabu. Wakati mwingine tawala huanguka si kwa sababu ni dhaifu, bali kwa sababu hazikuweza kusoma ishara za wakati. Wakati mwingine malkia husimama imara, bila kujua kwamba ndiye anayeshikilia mwenge wa mwisho wa enzi.
Pengine haya ni mawazo tu, au pengine ni kivuli cha unabii.
