Septemba 16, 2025 ligi kuu soka Tanzania bara msimu wa 2025/2026 inatarajiwa kufunguliwa kupitia mchezo wa
ngao ya jamii utakaowakutanisha watani wa jadi Yanga SC na Simba SC zote kutoka Dar es salaam. Kila mechi inayowakutanisha wababe hao wa soka kutoka Tanzania imekua ikiambatana na utani, mizaha kwa pande zote mbili jambo ambalo limekuwa likichochea hamasa na kuwavutia wengi pindi timu hizo zinapokutana.
Sasa ipo
taarifa inayosambazwa katika mitandao ya kijamii, ikidaiwa kuwa ni taarifa kwa umma iliyotolewa na timu ya Simba kuelekea mechezo wa Septemba 16, kuomba radhi mashabiki wake kushindwa kuvumilia utani wa Yanga SC.
"Klabu ya Simba SC inapenda kutoa taarifa kwa Umma kuwa inaomba radhi kwa moshabiki wake wote kwa kushindwa kuvumilia utani umbaõ Klabu ya Yanga imekuwa ikifinaya kuelekea michezo yetu.
Kupitia barua hii, Simba SC inaomba Klabu ya Yanga kusitisha utani huu kwani hauna afya kwa maendeleo ya soka letu."
Je, ni kweli taarifa hiyo imetolewa na Simba SC?
JamiiCheck imefuatilia na kubaini kuwa taarifa hiyo si ya kweli. Kupitia utafutaji wa maneno muhimu (Key words search) imebainika kuwa haijatolewa na
Simba SC, kwani kurasa zake rasmi za mitandao ya kijamii hazijachapisha taarifa hiyo.
Aidha yapo baadhi ya mapungufu katika barua hiyo yanayoashiria kuwa imeghushiwa na wapotoshaji. Mpangilio mzima haufanani naule unaotumika katika taarifa rasmi za Simba SC, Matumizi ya nembo isiyo ya Smba SC, makosa ya kisarufi, kukosewa kwa baadhi ya maneno, kutokuwekwa bayana kwa tarehe iliyotolewa na kadhalika.
Rejea
hapa taarifa rasmi ya Simba SC.