Serikali ya Tanzania imesema itaendelea kuheshimu mikataba yake na kampuni tanzu ya Adani Group licha ya mashtaka mapya dhidi ya Gautam Adani, mwenyekiti bilionea wa kundi hilo, anayekabiliwa na tuhuma za utoaji hongo na udanganyifu, afisa mwandamizi wa Mamlaka ya Bandari amethibitisha.
Wiki iliyopita, Adani na mpwa wake walikabiliwa na mashtaka ya udanganyifu na hati za kukamatwa zilitolewa dhidi yao, wakituhumiwa kupanga njama ya dola milioni 265 kuwahonga maafisa wa India ili kupata mikataba ya usambazaji wa umeme. Hata hivyo, Adani Group imekana tuhuma hizo.
Mwezi Mei, Tanzania ilisaini mkataba wa miaka 30 na Adani Ports, kampuni tanzu ya Adani Group, kuendesha Gati ya Makontena 2 katika Bandari ya Dar es Salaam. Mkataba huo pia ulijumuisha ununuzi wa asilimia 95 ya hisa za Kampuni ya Huduma za Gati za Makontena za Kimataifa ya Tanzania (TICTS) kwa dola milioni 95.
"Hatujakuwa na matatizo na mtu yeyote. Shughuli zetu zote zinafanywa kwa mujibu wa sheria na makubaliano yetu," alisema Plasduce Mbossa, Mkurugenzi Mkuu wa Mamlaka ya Bandari Tanzania, alipoongea na Reuters Jumanne. Alisisitiza kuwa Tanzania haikabiliwi na madai yoyote ya udanganyifu kuhusu mikataba yake. "Kama kuna watu wengine wanachukua hatua, basi wanachukua kwa sababu zao."
Wakati huohuo, nchini Kenya jirani, Rais William Ruto hivi karibuni alifuta mkataba wa Adani wa ujenzi wa njia za kusafirisha umeme. Pia alikataa mapendekezo ya kuongeza barabara ya pili ya ndege na kuboresha kituo cha abiria katika Uwanja wa Ndege wa Kimataifa wa Jomo Kenyatta, mpango ambao ungehusisha mkataba wa upangaji wa miaka 30.
PIA SOMA
-
Bilionea Gautam Adani ambaye Kafulila anataka kumpa shirika la TANESCO ashitakiwa kwa utapeli huko Marekani