[h=5]Hakika ukiona mahali ndani ya nchi wananchi wake wanamaisha magumu ya dhiki isiyosemeka na serikali haiwajali na bado watu hao wako kimya usijidanganye kuwa sehemu hiyo ina amani kwani yawezekana ukimya wao ni matokeo ya: Ujinga uliowatawala ama hawajui pa kuanzia hivyo wanasubiri tu nani amfunge paka kengele.
Kwa viongozi tulionao kuliona hili kwa ukweli wake ni vigumu mno kwa sababu akilini mwao bado wanaamini wananchi wanaowaongoza hawajajitambua hivyo hakuna haja ya kuwafikiria kwani hata hivyo ujinga wao ndio mtaji wao kisiasa kwa sababu wakikumbukwa kipindi cha "come Pain" kwa kupewa Tsht,kofia,kanga na Tsh 5000 kwa wale walioshinda juani siku nzima basi hayo ni maisha kwao na kila afanyaye hivyo ni mtu mwema sana kwao na fadhila pekee ya kumlipa ni kumpigia kura.
Watanzania wenzangu tumetumiwa vya kutosha na tumelipwa mabaya vya kutosha na kwa maumivu haya ya maisha magumu,mfumuko wa bei,anguko la elimu ya vijana wetu,viongozi kushutumiwa kushiriki kuhujumu nchi kwa kuuza nyara za serikali kama wanyama na pembe za ndovu nje ya nchi bila kusikia kauli thabiti ya kukea zaidi ya kuteteana na kupeana nyadhifa kubwa ndani ya chama,manyanyaso yanayofanywa na wanaoitwa wawekezaji chini ya msaada wa vyombo vya dola kama kule nyamongo,Geita na Loliondo na mambo mengine chungu nzima basi tujitathmini na kupima mambo hayo.
Maamuzi yetu sharti yawe bayana kama tumeumizwa vya kutosha na huu mfumo wa kulindana na kulinda maovu basi tuamue na kama bado hatujaumizwa vya kutosha basi tuendelee kuwaacha wajanja wachache chini ya mfumo wao waendelee kuitafuna nchi huku tukisubiri fadhila zao pindi watakapojisikia kufanya hivyo na kamwe asitokee wa kulalamika hata mambo yakiwa magumu zaidi ya hapo.
Mwisho kabisa niwaombe sote tujiandae kushiriki katika njia za kidemokrasia zitakazowekwa ili kuwapata wale tunaodhani watasimama kwa niaba yetu na kwa ajili yetu kwani kwa kushiriki huko tutakuwa tumeamua kwa maamuzi ya pamoja kujiweka rehani au kubaki na hatamu.
Asanteni sana kwa wote mtakaonielewa kwa nia njema,aidha niwashukuru pia wale watakaoona nimegusa maslahi yao na kuyahatarisha. Niseme tu nipo tayari kwa changamoto za pande zote mbili.
By: Tanzania Nchi Yetu Sote[/h]