Unleashed Vol. 1 Fikira tofauti za mabadiliko ni mfululizo wa makala sita (moja ni ya Rev. Kishoka) ambazo zote zina lengo la kuzidi kuchochea mabadiliko ya fikra ambayo hutangulia mabadiliko ya kura. Makala hizi zote zinaweza kuchapwa na gazeti lolote la Tanzania bila kubadili maudhui yake au jina la mtunzi. Makala zote zinapotumika kwenye magazeti zihakikishe zinabakia jina la Mtunzi na vile vile kutoa anuani ya barua pepe iliyo chini ya kila makala.
- Alichosema Mwakyembe ndiyo kauli ya Vita
Katika makala hii ninaangalia kauli iliyonukuliwa na gazeti la MwanaHalisi kuhusu Dr. Mwakyembe katika mgongano uliotokea kwenye kikao cha NEC kule Dodoma wiki chache zilizopita. Kauli hiyo tukiifuatilia ninaamini inatosha kabisa kuwa ni mbiu ya mapambano haya ya kuutokomeza ufisadi. Katika hili, wapambanaji CCM wamechukua msimamo sahihi na wa kuungwa mkono.
- Kuulewa mfumo wa Utawala wa Kifisadi (MUK) 207
Hii ni mwendelezo wa makala ya kuelewa mfumo wa utawala wa kifisadi. Hii ni kozi nzito na mada nzito ambayo inahitaji uvutaji pumzi wa mara kwa mara kuweza kuzama. Hii siyo mada kwa watu wavivu kusoma au kufikiri au wanaochoka mapema kuchambua mambo. Kama ulielewa sehemu ya 101 basi uko tayari kuendelea mbele. Katika makala hii tunaangalia
wanufaika, waathirika, na wanusurika wa mfumo wa kifisadi.
- Na Wapo Machangudoa wa Ufisadi
Baada ya kuingiza maneno ya watawala wetu, Makuwadi wa ufisadi, vikaragosi vya ufisadi naomba niongeze neno jipya katika misamiati hii ya vita; kuwa wapo pia machangudoa wa ufisadi. Hawa ni wengi na wengine wapo miongoni mwetu. Makala hii ina lugha na picha za mafumbo zenye kugusa watu wazima. Soma kwa kukereka kwako.
- Tuache kumsingizia Mungu, tujiandae kwa majanga
Hii ni mwendelezo wa makala mbili nilizotoa mwaka jana. Moja mwezi Aprili na nyingine baada ya vifo Tabora Oktoba Mosi mwaka jana. Oktoba mosi imekuja wiki iliyopita bila ya watu hata kukumbuka siku ile ya huzuni. Ni makala ambayo pia imetokana na kufuatilia vifo vya watoto wengine katika ajali ya moto wiki hii iliyopita. Ni makala yamapendekezo ya kina ya kujiandaa kwa majanga. Mtu yeyote ambaye ni kiongozi wa ofisi, idara, wizara au kitengo fulani ningemlazimisha kuisoma.
- Usalama wa Taifa lazima ubadlike, kama tunataka tusalimike
Hii ni sehemu ya kwanza ya makala ya mapendekezo yamabadiliko yanayohitajika katika idara ya Usalama wa Taifa. Makala hii imekuja baada ya kuombwa kwa muda mrefu na baadhi ya marafiki zangu wa idara hii kuandika juu ya hali ya usalama wa taifa nchini. Nilivunja mwiko wa kuijadili idara hii mwaka jana na Zitto akavunja Mwiko Bungeni mwaka huo huo, na sasa naona tuende mbele zaidi. Kama sehemu ya kwanza, ni kozi tosha kabisa kwa mtu anayetaka kuelewa usalama wetu wa taifa umetoka wapi na unaelekea wapi.
Makala hii ni ya Rev. Kishoka ambayo tukiwa tumeandika nyakati tofauti na bila ya mawasiliano tumejikuta tukigusia kitu kile kile. Nimemuomba niambatanishe kwenye mfululizo huu. Nayo kama hiyo ya kwangu ya machangudo nayo imejaa picha na hoja za nguvu. Kwa mara nyingine, Mchungaji wetu anazidi kuvutia kwa utamu wa maandishi yake.
NB: Unaweza kuangalia moja moja kama zilivyohapa au kuzichukua kama sanduku moja la .RAR na ukalifungue kujisomea kwa raha zako. Ukiweza sambaza kwa wale wanaoweza kuzisoma!
Katika volume ya pili mojawapo ya mada nilizozifanyia kazi kwa muda mrefu ni ile ya "UKOSOAJI WA WAZI WA CHADEMA - 1).
