Upishi wa Wali, Samaki wa Nazi na Mboga

[Jade_]

Habari za Jumamosi wakuu, natumai mpo salama. Leo nawaletea mapishi ya wali, samaki wa nazi na mboga.

Ukipenda kuangalia video ya haya mapishi unaweza kuangalia hapo chini. Ukipenda unaweza “kuilike” hiyo video, “kusubscribe” kwenye channel yangu na kuangalia video nyingine.

Turudi kwenye mapishi yetu.

Wali
Nimeanza kwa kuchambua na kuosha mchele. Nimetumia mchele wa kawaida, sijatumia basmati kwa sababu siupendi kwa kutokua na harufi wala ladha yake yenyewe.

Kuchambua mchele

Kuosha mchele


Baada ya mchele kuwa safi nimeuweka kwenye sufuria na maji ya wastani. Nimetia mafuta, chumvi, nimekoroga na kuanza kuupika.

Mchanganyiko wa wali ukiwa jikoni

Baada ya muda maji yamekauka na wali wetu umeanza kuiva. Nimeugeuza ili uive kote na nimeongeza maji ya moto kidogo sana ili mvuke uusaidie wali kuiva. Nimefunikia mpaka umeiva kabisa.

Nikigeuza wali wangu

Nikiongeza maji kidogo sana ya moto

Wali ukiwa tayari


Samaki

Samaki aina ya sato


Nimemtayarisha samaki aina ya sato kwa kukwangua magamba yake, kuondoa mapezi (wengine wanayaacha au wanayatoa na kuyakaanga pembeni) na ute kwenye kichwa.

Nikikwangua magamba ya samaki

Nikiondoa mapezi na ute

Samaki akiwa msafi

Baada ya hapo samaki wangu nimempaka chumvi ya kutosha na kumkaanga kwenye mafuta kidogo yaliyopata moto hasa. Baada ya muda nimegeuza vipande vyangu vya samaki mpaka vimeiva vizuri. Nimetoa samaki jikoni na kuweka pembeni

Nikipaka vipande vya samaki chumvi

Naanza kukaanga samaki kwenye mafuta kidogo

Nikigeuza samaki

Samaki zimeiva


Nimeanza maandalizi ya mchuzi wa samaki kwa kukatakata vitunguu na nyanya

Nikikata nyanya na vitunguu


Kwenye kile chombo nilichokaangia samaki nimeanza kukaanga vitunguu. Baada ya kupata rangi kidogo nimeweka chumvi na kitunguu saumu na kukaanga kwa muda kidogo.

Nikikaanga vitunguu

Nikiweka kitunguu saumu


Baada ya hapo nimeweka nyanya na kuziacha mpaka zimelainika kabisa na kuwa mchuzi. Nimehamishia mchuzi wangu kwenye sufuria nyingine ili inirahisishie mapishi.

Nimeongezea nyanya kwenye vitunguu

Mchuzi wangu ukiwa tayari na kwenye sufuria nyingine

Nimekorogea tui la nazi taratibu kwenye mchuzi na nimeendelea kukoroga mpaka umechemka. Ulivyochemka, nimeweka vipande vya samaki nilivyokaanga na nimekamulia limao. Nimeacha imechemka kidogo ndio nikatoa jikoni.

Nikikorogea tui la nazi kwenye mchuzi wangu

Nikiweka vipande vya samaki vilivyokaangwa kwenye mchuzi

Nikikamulia limao

Mchuzi ukiwa tayari


Mboga

Kwa pishi la leo mboga tunazotumia ni mchanganyiko wa “chinese” na “spinach”. Unazikatakata na kuzichanganya kwenye sufuria pamoja na mafuta.

Nikikatakata mboga

Mboga zikiwa jikoni



Zikianza kuiva katia kitunguu na ukorogee kwenye mboga pamoja na chumvi. Acha mchanganyiko ukae jikoni mpaka vitunguu viive kidogo alfu utoe motoni.

Mboga na vitunguu jikoni

Mboga ikiwa tayari


Upakuaji

Nikipakua wali kwenye sahani

Nikiweka samaki na mchuzi wake juu ya wali

Nikiweka mboga kwenye sahani

 

[Jade_]

Chakula changu kwa ukaribu

Nyama ya samaki kwa ukaribu

Wali, samaki wa nazi na mboga

Ndio mwisho wa mapishi, chakula kilikuwa kitamu na chenye harufu nzuri ya nazi.

 

[Mpwayungu Village]

Safi kabisa upo vizuri

 

[Jade_]

Safi kabisa upo vizuri

Ahsante. Karibu mkuu.

 

[Offshore Seamen]

Vizuri sana, kupika ni ujuzi usiokoma.

 

[HIMARS]

Napenda chakula kizuri

Sipendi uchafu

 

[Jade_]

Vizuri sana, kupika ni ujuzi usiokoma.

Ahsante. Ni kweli utajifunza kupika mpaka siku ya mwisho.

 

[Jade_]

Napenda chakula kizuri

Sipendi uchafu

Ndio mkuu huwezi kula uchafu.

 

[Offshore Seamen]

Ahsante. Ni kweli utajifunza kupika mpaka siku ya mwisho.

Ngoja niongeze juhudi kujifunza nikafungue mgahawa Mayotte au Congo kwa kina shofee

 

[tamuuuuu]

Umeolewa?

 

[tamuuuuu]

Ila lakini anayekata mboga za majani na anayepakua wali ni watu tofauti. How hapo?

 

[Asprin]

Ila lakini anayekata mboga za majani na anayepakua wali ni watu tofauti. How hapo?

Macho yako kama yangu. Nadhani ni bibi na mjukuu wanafanya mapishi.

Kongole kwao

 

[benza]

Big up

 

[Jade_]

Ngoja niongeze juhudi kujifunza nikafungue mgahawa Mayotte au Congo kwa kina shofee

Hahaha ukipika vizuri huwezi kukosa wateja wa kutosha.

 

[Jade_]

Big up

Ahsante.

 

[Jade_]

Ila lakini anayekata mboga za majani na anayepakua wali ni watu tofauti. How hapo?

Tumeshirikiana watu wawili mkuu.

 

[Jade_]

Macho yako kama yangu. Nadhani ni bibi na mjukuu wanafanya mapishi.

Kongole kwao

Ndio mkuu tumeshirikiana watu wawili.

 

[Bantu Lady]

All in all chakula kinaonyesha ni kitamu, usafi umezingatiwa...
Binafsi ni mpenzi wa kupikia nazi, hapo umenifikisha.. hongera

 

[F16 Falcon]

Kwa huu uzi na mida hii, tayari nishasikia njaa ngoja nitoke sasa nikatafute msosi

 

[Mjamaa1]

Hongera sana , nimepata hamu ghafla. Bila shaka faza hausi anafurahia sana mapishi ya nyumbani kwake.