Usafiri wa mwendokasi: Ukombozi uliogeuka mateso kwa wakazi wa Dar es Salaam

Usafiri wa mwendokasi: Ukombozi uliogeuka mateso kwa wakazi wa Dar es Salaam

Ozon

JF-Expert Member
Joined
Dec 19, 2024
Posts
2,910
Reaction score
4,711
Katika mji wa Dar es Salaam unaokua kwa kasi kubwa – kijamii na kiuchumi – changamoto ya usafiri wa umma imeendelea kuwa doa kubwa katika jitihada za kuimarisha maisha ya wakazi wake. Mradi wa Mabasi Yaendayo Haraka (BRT), ambao ulizinduliwa kwa mbwembwe na matumaini makubwa ya kupunguza msongamano na kuboresha huduma za usafiri, sasa unakumbwa na lawama nzito kutoka kwa watumiaji wake.

Ripoti na ushuhuda kutoka kwa wananchi mbalimbali zinaonesha kuwa huduma ya Mwendokasi haijakidhi mahitaji ya wakazi wa jiji hili, na badala yake imekuwa chanzo cha adha na mateso ya kila siku. Magari haya yamekuwa yakibeba abiria kupita kiasi, kiasi cha kuwakosesha hewa ya kutosha na kuwafanya wahisi kana kwamba ni wanyama wanaosafirishwa sokoni.

Ukifika Kivukoni au Kimara asubuhi, ni sawa na kuingia kwenye jukwaa la mateso. Watu wanabebwa kama mizigo, wamesongamana hadi hakuna nafasi ya kupumua.

Mbaya zaidi, mifumo ya hewa (AC) katika baadhi ya magari ya Mwendokasi haifanyi kazi kwa ufanisi. Hali hii imeongeza hatari za kiafya, hasa katika kipindi cha joto na wakati wa milipuko ya magonjwa ya kuambukiza.

Uchovu Mkubwa Unaoathiri Maisha ya Wananchi.

Msongamano huu wa kupindukia na hali ya kukosa hewa ya kutosha hupelekea uchovu wa kupindukia kwa abiria, hasa asubuhi wanapokwenda kazini au jioni wanaporudi makwao. Watu huanza siku wakiwa tayari wamechoka kimwili na kiakili kabla hata ya kufika maeneo yao ya kazi, hali inayopunguza ufanisi kazini na kudumaza uchumi wa mtu binafsi na taifa kwa ujumla. Jioni, uchovu huo huo huwalazimu kurudi nyumbani wakiwa wameishiwa nguvu kabisa– hali ambayo huathiri hata maisha ya kifamilia na kijamii.

Ukimya wa Wananchi na Uzembe wa Viongozi.

Kinachosikitisha zaidi ni ukimya wa abiria ambao, kwa kiwango kikubwa, unaashiria kukata tamaa na kutokuamini tena uwepo wa mabadiliko. Ukimya huu unazidi kuwapa nafasi wasimamizi wa huduma hii kuendelea na hali ya uzembe bila kuwajibika.

Cha kusikitisha zaidi, viongozi wengi wa serikali na watoa maamuzi hawaguswi na mateso haya kwa sababu wao hutumia magari ya kifahari yenye vioo vya giza, hali ya hewa ya baridi, na misafara mirefu inayopita hata katika barabara zilizopigwa marufuku kwa magari binafsi. Wakati mwingine, magari yao hupewa kipaumbele hadi kusimamisha magari ya kawaida barabarani, hali inayoonyesha wazi kuwa hawako karibu na wananchi wanaohangaika na usafiri wa kila siku. Wananchi wanaonekana kuwa kama vumbi la miguuni mwao—wasiostahili kusikilizwa wala kutazamwa kwa jicho la huruma.

Uzalilishaji wa Wanawake Katika Mabasi.

Katika hali ya kusikitisha, wanawake wengi wamekuwa wakikumbwa na vitendo vya udhalilishaji wa kijinsia ndani ya mabasi haya ya Mwendokasi – hasa wakati wa msongamano mkubwa. Kutokana na wingi wa watu na ukosefu wa nafasi, baadhi ya wanawake wameripoti kuguswa isivyofaa, kushikwa maeneo ya miili yao bila ridhaa, au hata kuwekewa miili kwa makusudi. Kwa kuwa mazingira hayaruhusu kujitetea au hata kusikika, wanawake wengi wamebeba maumivu haya kwa kimya kikubwa, jambo ambalo linaathiri hali yao ya kisaikolojia.

Matukio haya yamekuwa kama "siri ya wazi" katika mfumo wa usafiri wa umma, lakini bado hakuna utaratibu maalum wa kuyakabili wala kutoa msaada kwa waathirika. Hili ni jambo linalohitaji kuchukuliwa kwa uzito mkubwa.

Wito kwa Hatua za Haraka

Ni muda wa kuchukua hatua. Miongoni mwa mapendekezo ya haraka ni:
  1. Kuongeza idadi ya mabasi katika maeneo yenye msongamano mkubwa.
  2. Kuboresha mifumo ya uingizaji hewa katika magari yote.
  3. Kuweka mikakati madhubuti ya usimamizi na uwajibikaji kwa wahusika wa huduma.
  4. Kuanzisha safari za viongozi wa serikali kutumia usafiri wa umma angalau mara moja kwa wiki ili wapate kuona hali halisi ya maisha ya wananchi.
Usafiri wa umma hauna budi kuwa wa heshima, salama, na unaojali utu wa mwananchi. Kukaa kimya ni kuendeleza mateso. Ni wakati wa kusimama na kudai mabadiliko yenye tija.
 
Dar changamoto usafiri ata ukiwa na gari kuna mda foleni nayo kero unatamani ata utembee
 
Back
Top Bottom