Wewe nimekuambia Nenda Burundi kwanza Nchi yako Uakikishe kuna amani ndio uje Kenya
MBUNGE wa Gatundu Kusini Bw Moses Kuria amedai kuwa ana ushahidi kuwa baadhi ya wandani wa kinara wa ODM Bw Raila Odinga wanashiriki mikutano na wahalifu wenye ujuzi wa kudukua kuhusu njia za kuiba kura za uchaguzi mkuu wa 2017.
Amesema kuwa kuna mwanasheria wa hadhi katika kundi la Bw Odinga ambaye ameshiriki mikutano kadhaa na madalali wa kimataifa kuhusu uhaini wa kimitambo na ambapo njama ni washirikishwe katika kuandaa mikakati ya kutatiza mitambo ya kieletroniki katika uchaguzi wa 2017.
“Ndiyo sababu wamekerwa sana na kubadilisha sheria zetu za uchaguzi ili kukumbatia analogi kama njia moja ya kushirikisha uchaguzi huo. Tulipobadilisha sheria hizo Alhamisi asubuhi, wafuasi wa Bw Odinga walijua kuwa njama yao imetibuliwa na kwa sasa hawana lingine ila tu kushiriki uchaguzi huru na wa haki,” akasema Moses Kuria.
Alisema kuwa kwa sasa “maandamano hayo ambayo wametishia kuzindua Januari 4, 2017 hayana umuhimu wowote na wanaweza wakayashiriki kwa miaka 10 mfululizo.”
Akasema: “Badala ya wajipange na waelewe kuwa njia yao ya wizi wa kura imefungwa na haifunguki hivi karibuni, wanatangaza kuwa wataandamana.
Wanaandamana hata kabla yao kutambua mgombea wao wa Urais.
Sisi tutaendelea mbele na uchaguzi mkuu wa 2017 na tutaushiriki Cord wakiwa ndani yake au nje yake.”
Alisema kuwa Cord ilikuwa imeelekeza matumaini yao ya ushindi kwa ukora wa kimitambo na ambao kwa sasa umevunjwa na bunge kupitia marekebisho hayo ya sheria za uchaguzi mnamo Alhamisi asubuhi.
Alisema kuwa ODM na Bw Odinga ndio wahifadhi wa “mamluki wa kimitambo kwa jina Michael Yard na ambaye amekuwa akifanya kazi katika makao makuu ya Tume Huru ya Uchaguzi na Mipaka (IEBC)."
Huyo Bw Yard, kulingana na Kuria ndiye katika uchaguzi mkuu wa 2013 alikuwa amechokora mitambo ya IEBC kiasi kwamba kura zilizoharibika zilikuwa zikipeperushwa zikiwa zimeongezwa na njama ilikuwa ya Cord kuzuke upungufu wa kura halali ili awamu ya pili ya uchaguzi huo iandaliwe.
“Ili kuficha nia yake na washirika wake, Bw Odinga amekuwa akilia kila uchao kuna njama ya Jubilee ya kuiba kura.
Ukweli ni kuwa, yeye ndiye amekuwa akipanga njama hiyo akisaidiana na washirika wake wa ng’ambo na ambao wamekuwa wakimfadhili,” akasema.
Kumzima Raila
Bw Kuria alisema kuwa serikali bado itaendelea kumzima Bw Odinga kuafikia usaidizi huo wa hujuma.
“Tutamulika jinsi anavyopokezwa pesa zake za kampeni na anavyozitumia. Yeye ni Mkenya kama wengine na hayuko juu ya sheria.
Tutamumulika kiasi cha kumwacha uchi kabisa katika njama zake za kuhujumu usalama wa kitaifa kupitia njama za uchaguzi wa 2017.
Kwa sasa ako na habari kamili kuwa tunamuelewa kwa dhati na ameanza kubabaika.
Wacha aende kwa maandamano, tumemuzoea akiwa barabarani,” akasema
