Utenzi kamili wa jina la Mwaka 2013 "WEBANGE" kama ulivyotungwa na Mwanasheria Ladislaus Rwezaula Kaijage
OMWAKA 2013 NI WEBANGE
Mpaho nu waitu omuntu akuha rugano omuha rundi kandi mantisi, nikyo kileta enkuru eyeirai. Emigani kelihwa, ebyeirai byachweeka kandi na
nsi eligaruka twagitera enkinya. Isi kabili bityo kigasileki iwe na inye
Kwechoncha? Tubaile nitwechoncha kugasha guhai? Isi ebyo twechoncheile twabigwanisa?
Leka banyaishaija na banyaikazi lamurwa. Buli kaishemuntu weena, buli kashoke mbali alaba ali,
yebange ebyo
oyechoncheile obone oburungi bwabyo. Kumanya twechonsile, leeba omubili gwa
Nyakutununta tulemilwe twagugobya akaanya kagwo akeirai lyona. Twechonsile kurashanisa enjara, obunafu, amalwara na byona ebikagendanwa, kyonkai etabaro yaitu tegobekereile enshonga enjara tukyainayo! Nangu kandi ekiiza neihasha aliwo olwo yakutunena muno kandi
munyauko tolikugibona.
Tutakweremba tuti kuhonderana na okwo twechonsile shana lundi akarembe kakubahyo. Buli kiro ekilikuhingula, obulola nibugenderela kugumangana nkeibare. Abaana omushule abandi tibakigyayo enshonga yebibarwa abazaire abandi tibainabyo. Kyamazimakwo abatwazi baitu bakatumanyisa nkokwo abana eminyeto boona balashomela bushai!! Kyonkai abatwaazi bonene bonene nibatulya kashuma, noshanga amaela agalikwendwa omushule gangi hakili katwakumanyile ka kimoi okwo lazima tulipe omushoro gweshule.
Tutakweremba tuti umuhulilijanganyo guliyo mala gutebekaine. Cheke. Olwo tulikujwangana na abantu abandi abamahanga agatali gamoi, twemanye. Okuba ebilikubajangula bakubituhikya naichwe bitubaho. Tolikuleeba abamahanga okwo babandize kugooka, bajangula amashwele gaabo nibenda omushaija kaashwera mushaijondi na omukazi akashweerwa mukazondi. Oku kugooka kwa nkahai!! Isi nka twashagao nebigunju!! Kwema wabaho olaboine empairumi negoobeka empairumi endi? Anga ekinumi nikifukira ekinumi kitahi kyakyo? Anga enkokoromi neebendeka enkokoromi endi? Olwo ebigunju ebyo tulikushaagya amagezi byamanya kusholoora, omuntu kashoke yaitwaaki?
Byona ebi munyansi twakubyeshumba ka buli kaishemuntu weena alayekomekereza ni kiki ni kihai ekyo alikulagilwa kumanya nokukola. Kootebangire okamanya emihango ya Mungu, tolimanya kintu kya kukola kandi tolimanya mbali olikolera Omukama Mungu omuliisho!! Emihango ya Mungu nilwo Rumuli rutukurembera. Wenawena ayakuhumya atalebile Rumuli olwo, yagenda, ogwo takili!! Otakwiija okeelemba angili kweeshwanta oti nka emihango ya Mungu ningichwa bulikilo mara obulola bwange bukyalige. Koolaba olyootyo, kaziro oli wokuganyira muno mara wokushabira. Olamanya mantisi olugya kwiita embwa, rubanza lugiziba enyindo!! Omukama Mungu tachoobolelwa kandi toina kumanya kilo na ibanga elyo alikwendelao. Aho mbwenu
kootebangile mwaa, tolikumanya okwo eiguru lyakukushubwa?
Okwo kilikuzoka buli kilo ekilikurabaho sitani neiye lya wenene nibakwaata ebilashaniso ebisikiile muno. Byona ebyo ngu batuhumye, batuhenze engo, batujojobye bamare batusiriikye. Kyokai oijuke okwo Omukama Mungu yalaganisainye abagurusi baitu abalimu ta Ibrahimu ati tindisosotora ruzaaro olu kulusiriikya lwoona. Kyonkai akashuba yagamba ati taliikiliza omuntu ekitondanwa kyawenene kayeekuza akajangula Ruhanga wa wenene ayamutonzile. Akanya akandi akagilaati olwo mulaagya omubilengeso ebishagulilaine, muijukage kushoma enshara nokutaka ali Ruhanga nabatakatifube babatemu amagara mubase kulashana nokusinga ebilengeso ebyo. Aho ndenga wabona mara washobookelwa kubaki
webange kwema Januari mpaka Desemba. Taliyo kaanya ako otaligwa mubilengeso. Bulikiro na buli ibanga abasitani baikara batuzigiliire kutufakaza ngu tushenge Omukama waitu. Oijuke okwo twaagilaga ensi ekyaali nungi tuti: Endeeto-Enjara; Ekyakwiija-Nkiita; Okiisaki-Eichumu nomwooro. Mbweenu
koteebangile okakwaata eichumu nomwooro gwawe nizo
Nshala likyalikarai, oti ekyakwiija wakukiisaki?
Isi
tweebange tutai? Haa, okubaza ti butamanya. Ayabaza aba nayenda kumanya. Akanya ka katakatifu noomanya mbali kali, genda otake. Omushalaba noomanya mbali guli, genda wechuze mara otake. Emyaanya yokuramagirao nka NYAKIJOGA noogimanya. Genda oramage otake bwooli. Abatakatifu endonkwa za Mungu nobamanya angili kolaaba otalikubamanya baza. Batakeo obagambile bakurembeza enshala zawe obone okwo olagoshooka. Otateka mikono munyorozi okaikara otongize mwaa zambaba ezababile Kamihanda. Nomanya katugoba akanya nkako twagobaho buli kaishemuntu weena akoze obwengebwe nokwirukisa amaguruge. Kolatwaalwa ekikukuro anga okaba bagenda ngenda bagaruka ngaruka aho olaba otainamu
kwebanga kwonakwona shana zakulya!
Mpahonu banyaishaija na banyaikazi twamazile kwechoncha, tweme hamoi
twebange kyonkai buli muntu omungeli yawenene, tulebe nka tulanyinya obuhuru obwo sitani neiye lyawenene balikuleetwamu.
Webange omalize nomanya okwo oli kitondano kyOmukama Mungu otakwenaganaga.
Webange eizooba lyazoobagirira
atebangire nitwiija kumusiga ahabishambara ataina gashambagira!!
Webange mantisi buli kaishemuntu weena agila akaanyake akokusimbagilizao kujuna banu nokusindika eitara.
Kotebangile, akanya kawe ako nibaija kukakushwaikura kashuma.
Kotebangile, eheee, wafa oyemeleire nkemotoka!!
WEBANGE, WEBANGE otashuburugukwa.
Ladislaus Rwezaula Kaijage,
Eparokia ya Kihesa, Ekigango kya Mkimbizi
Ejimbo lya Iringa
