Hospitali ya Taifa Muhimbili
Public Institution
- Apr 9, 2026
- 13
- 38
WAZIRI MCHENGERWA: MUHIMBILI MPYA SIYO MRADI WA AFYA TU, NI UWEKEZAJI WA KIMKAKATI
Serikali imeeleza kuwa kuijenga upya Hospitali ya Taifa Muhimbili si mradi wa afya pekee bali ni uwekezaji wa kimkakati wenye maslahi mapana ya kitaifa na kimataifa katika sekta ya tiba, elimu, utafiti na uchumi wa huduma za afya.
Akizungumza leo bungeni Dodoma wakati wa kuwasilisha bajeti ya Wizara ya Afya ya mwaka 2026/27, Waziri wa Afya Mohamed Mchengerwa amesema mradi huo unalenga kuifanya Tanzania kuwa kitovu cha huduma za kibingwa na ubingwa bobezi barani Afrika huku ukipunguza gharama za kuwapeleka wagonjwa kutibiwa nje ya nchi.
"Mradi wa Muhimbili mpya si mradi wa afya pekee bali ni uwekezaji wa kimkakati katika uchumi wa kisasa kwani utapunguza rufaa za matibabu nje ya nchi, kuongeza utalii wa tiba, kuvutia wawekezaji na mashirika ya kimataifa pamoja na kusaidia kukuza vipaji na utaalam wa wataalam wa afya nchini." amesema Mh.Mchengerwa
Aidha ameongeza kuwa kukamilika kwa Muhimbili mpya kutaifanya hospitali hiyo kupanda kutoka ngazi ya tatu hadi ngazi ya nne ya ubora wa utoaji huduma kwa viwango vya kimataifa, hatua ambayo itaongeza uwezo wa Tanzania kutoa huduma za kisasa zaidi za matibabu, mafunzo na tafiti.
Itakumbukwa kuwa ujenzi wa Muhimbili Mpya ni sehemu ya mpango wa muda mrefu ulioanza mwaka 2018 na unatarajiwa kutekelezwa kwa kipindi cha miaka mitano kwa gharama ya dola za Marekani milioni 468.469 (USD 468,469,000), sawa na zaidi ya shilingi trilioni 1.2 za Kitanzania. Kati ya fedha hizo, takribani dola za Marekani milioni 363.9 ni mkopo kutoka Korea Kusini, huku dola milioni 104.572 zikiwa ni mchango wa Serikali ya Tanzania kwa ajili ya kodi, maandalizi ya eneo la mradi pamoja na gharama nyinginezo.