2009-02-28 10:44:22
Na Joseph Mwendapole
Wasomi na wafanyabiashara mashuhuri nchini, wamesema kauli ya Waziri wa Fedha, Mustafa Mkulo, kuwa mtikisiko wa uchumi duniani hautaathiri uchumi wa Tanzania ni sawa na kichekesho.
Wakizungumza katika mkutano ulioandaliwa na Taasisi ya Sekta Binafsi Tanzania (TPSF), kwa ajili ya kutathmini kuanguka kwa uchumi wa dunia, wafanyabiashara na wasomi hao walisema hakuna namna ambavyo Tanzania inaweza kuepuka athari za mtikisiko huo.
Waziri Mkulo alikaririwa hivi karibuni akisema kuwa mtikisiko huo wa fedha hautaleta madhara kwa Tanzania.
Akitoa mhadhara kwenye mkutano huo, Mchumi wa Chuo Kikuu cha Dar es Salaam, Profesa Humphrey Mushi, alisema kauli hiyo ni ya kujidanganya tu, badala yake hatua za haraka na za makusudi zinapaswa kuchukuliwa ili kuepusha madhara makubwa yanayoweza kutokea.
Profesa Mushi alisema alimshangaa hata Mkurugenzi wa Kimataifa la Fedha (IFC), ambaye alizuru nchini hivi karibuni na kueleza kuwa Watanzania hawana sababu ya kuhofia kuanguka kwa uchumi wa dunia.
Mfanyabiashara wa siku nyingi nchini, Elvis Musiba, alisema haiwezekani Tanzania isiathirike na mtikisiko huo kwani hata bajeti yake kwa kiasi kikubwa imekuwa ikitegemea wafadhili.
``Hivi inaingia akilini kweli mtu anayekusaidia apate matatizo halafu wewe unayeishi kwa kusaidiwa na huyo mtu ujipe matumaini kuwa hutapata shida... Badala ya kuzungumza porojo tuweke mikakati madhubuti ya kuunusuru uchumi wetu maana hata bajeti ijayo sijui pesa tutapata wapi,`` alisema.
Aidha, Musiba alisema madhara ya mtikisiko huo ni makubwa hivyo lazima Watanzania wajifunge mkanda na serikali ipunguze matumizi yake na kuelekeza nguvu zaidi katika kilimo.
Alisema bei ya bidhaa imepanda kwa kasi kubwa na dawa ya kuishusha ni kuweka mkazo katika kilimo ili Tanzania iweze hata kuuza mazao mengi nje ya nchi.
``Uwezo wa kulima na kuzalisha kwa wingi tunao, lazima tujiulize mbona mafuta yanashuka na vyakula vinapanda na wakati wa kufanya mambo kwa vitendo ndio huu tusichelewe,`` alisisitiza Musiba.
Alisema ingawa mfumuko wa bei umefikia asilimia 13, sekta ya kilimo inaweza kuishusha hadi kufikia tarakimu moja.
Naye Katibu wa Shirikisho la Utalii Tanzania, Richard Rugimbana, alisema kauli ya serikali kuwa Tanzania haitaathirika na mtikisiko huo ni ya kushangaza kwani madhara yake yameshaanza kuonekana nchini.
Alisema idadi ya watalii nchini imeshaanza kupungua na wanatarajia inaweza kushuka kwa silimia hadi 50 hivyo mapato ya serikali kuporomoka.
``Sisi tunategemea kuuza vitu nje, sasa kama hao tunaowauzia wameathirika kiuchumi unatarajia vipi wewe uwe salama? Lazima tuwe na mkakati wa pamoja sisi wadau wa sekta binafsi na serikali kwa ajili ya kuangalia namna ya kunusuru hali hii,`` alisema.
Mwenyekiti wa TPSF, Ester Mkwizu alisema mtikisiko huo ni dhahiri utaiathiri Tanzania kwani baadhi ya sekta tayari zimeshaonja joto.
Alitoa mfano kuwa zao la pamba hivi sasa haliuziki nje ya nchi kutokana na bei yake kushuka kwa kiwango kikubwa na cha kutisha.
Alisema hata taasisi na benki nyingi zilizopo hapa nchini zitaathirika kwa kiwango kikubwa kwani nyingi zinategemea mitaji kwa benki zilizoko nchi za nje.
Mkulo alitoa kauli hiyo wakati akizungumza na wana-jumuiya ya Shirikisho la Wenye Viwanda (CTI), jijini Dar es Salaam.
Alisema hakuna viashiria vya kuwepo athari zinazotokana na mtikisiko wa fedha duniani, hapa nchini.
Alisema, sababu zinazoifanya Tanzania kutoathirika na mtikisiko huo, ni hatua ya kutokuwa mwanachama wa moja kwa moja katika taasisi za kiuchumi kimataifa.