"You Cannot Screw Up My Job" - Fred Machoka Aamuru Gloria Orwoba Aondoke Jukwaani

Sherehe ya kutimiza miaka 50 katika tasnia ya utangazaji ya mtangazaji mkongwe wa redionFred Obachi Machoka iligeuka kuwa gumzo baada ya kutokea kwa mvutano kati yake na mpwa wake, aliyekuwa Seneta Mteule Gloria Orwoba, kufuatia kauli za kisiasa zilizohusishwa na kaulimbiu ya “WANTAM”.

Tukio hilo lilitokea Jumamosi, Oktoba 10, 2026, katika ukumbi wa Ulinzi Sports Complex jijini Nairobi, wakati wa hafla ya Machoka@50 Grand Concert iliyowakutanisha wanamuziki, wanasiasa na watu mbalimbali maarufu kuadhimisha safari ya Machoka katika utangazaji.

Orwoba alikuwa amepewa kipaza sauti kusalamia waliohudhuria hafla hiyo. Hata hivyo, badala ya kuishia katika salamu za kawaida, alianza kutoa kauli za “WANTAM” na kuonyesha ishara ya mkono inayohusishwa na kaulimbiu hiyo. Kaulimbiu ya “WANTAM” hutumiwa na baadhi ya wakosoaji wa Rais William Ruto kuashiria msimamo wa kutaka rais huyo ahudumu kwa muhula mmoja tu.

Hatua hiyo haikuonekana kumpendeza Machoka, ambaye alisikika akiwaomba maafisa wa usalama kumwondoa Orwoba jukwaani.
“Please, security, toa huyu msichana hapa. Out,” alisema Machoka.

Aliendelea kusisitiza kuwa hataki kazi yake iharibiwe, akisema: “You cannot screw up my job.” Aidha alimkumbusha Orwoba kuwa akiwa pamoja na mjomba wake, anapaswa kufuata maelekezo yake.

Video hiyo imeibua mjadala kuhusu kilichotokea jukwaani na kama ujumbe wa kisiasa ulikuwa na nafasi katika hafla hiyo iliyokuwa imeandaliwa kuadhimisha kazi ya mtangazaji huyo.

Isitoshe, asubuhi ya Jumapili, Oktoba 11, Orwoba naye alijibu kupitia chapisho kwenye mitandao ya kijamii akisema: “Good Morning! Lazima nikumbushe Uncle mambo ni WANTAM!” Ujumbe huo uliongeza mjadala kuhusu tukio hilo, huku baadhi ya Wakenya wakijadili iwapo Orwoba alipaswa kuheshimu madhumuni ya hafla ya mjomba wake, na wengine wakitazama suala hilo kwa mtazamo wa uhuru wa kutoa maoni ya kisiasa.

Hafla ya Machoka@50 Grand Concert ilikuwa ya kuadhimisha miongo mitano ya mchango wa Machoka katika utangazaji, hasa kupitia vipindi vyake vinavyohusishwa na muziki wa rhumba.

Miongoni mwa wanamuziki waliohudhuria hafla hiyo ni nyota kutoka DRC, Koffi Olomide, pamoja na Mbilia Bel na Sam Fan Thomas. Hafla hiyo pia ilihudhuriwa na watu mashuhuri kutoka sekta ya habari, burudani na siasa.

Tukio hilo limeibua swali pana kuhusu namna siasa zinavyoingia katika hafla za kijamii na kifamilia, hasa wakati kaulimbiu za kisiasa zinapokuwa sehemu ya mjadala wa kitaifa.

Je, Gloria Orwoba alivuka mipaka kwa kuingiza kaulimbiu ya “WANTAM” katika sherehe ya miaka 50 ya kazi ya mjomba wake, au Fred Machoka alikuwa na haki ya kusisitiza kuwa hafla yake isiingiliwe na siasa?

Na Je, Wakenya wamefikia hatua ambapo hata sherehe za kifamilia haziwezi tena kuepuka mvutano wa kisiasa?