Pole sana wanafamilia wote, ndugu na marafiki. Mungu wa huruma awajalie moyo mkuu ili mpokee msiba huu kwa moyo wa imani na unyenyekevu.
Mungu wa huruma tunaomba umpokee mja wako kama alivyokuamini na kukutegemea. Tunaomba ukayaangalia mema yake kuliko makosa yake, na hasa kama alikutegemea na aliuishi kwa dhamira upendo wa Mungu.
Nasi tuliobakia, kila kitokeapo kifo kwa mwenzetu, tujue tunakumbushwa kuwa Duniani ni sehemu tu ya maandalizi ya maisha ya milele, tujiulize tunaandaaje maisha yetu ya baadaye?
Wale watekaji, wauaji, wabambikiaji kesi, mafisadi, na wadhulumu haki za wanadamu wenzao, mnakumbushwa kuwa sisi tu mavumbi, na mavumbini tutarudi. Ya nini muwaue wenzenu wakati sisi sote kuna siku lazima tukifikie kifo cha mwili.
Mnaoteka na kuua binadamu wenzenu mjue kuwa hiyo mnayofikiria ni adhabu kubwa sana mnawapa hao mnaowaua, ni ndogo sana kuliko adhabu mnayojipa. Hao mnaua miili yao, lakini ni kwa gharama kubwa sana ya kuua roho zenu.
Rais Samia, ingiwa na roho wa Mungu, ingiwa na hekima, hata kama huteki na kuua kwa mikono yako, na pengine siyo kwa amri yako, lakini ufahamu kuwa kila linalotokea chini ya mamlaka yako, usipolikana kwa kauli na vitendo, usipolizuia kwa kutumia mamlaka yako, moja kwa moja unabeba hukumu ya kuiua roho yako.
Tuombe hekima ili tujue namna sahihi ya kuuishi upendo wa Kristo, upendo wa Mungu wetu.
