Nawasalimu kwa jina la Jamhuri ya Muungano wa Tanzania.
Rais wa Jamhuri ya Muungano wa Tanzania na Mwenyekiti wa Chama Cha Mapinduzi Ndg. Samia Suluhu Hassan amerejea nchini na kupokelewa na watanzania wakiongozwa na Makamu wa Rais wa Tanzania Dkt. Philip Mpango katika Uwanja wa Ndege wa Kimataifa wa Mwalimu Julius Kambarage Nyerere (JNIA) jijini Dar Es Salaam leo tarehe 25 Septemba 2021 akitokea jijini New York nchini Marekani alikohudhuria Mkutano wa 76 wa Baraza la Umoja wa Mataifa.
Katika hotuba aliyoitoa baada ya kupokelewa, Rais Samia amesema yafuatayo kwa ufupi.
Rais Samia amewashukuru watanzania kwa kuiombea safari ya kwenda Umoja wa Mataifa, Mwenyezi Mungu amewawezesha wameenda na kurudi salama. Rais Samia amesema "Niwashukuru watanzania wote kwa sala na dua zenu wakati wote mkiwa mnaniombea. Nivishukuru zaidi vyama vya siasa ambavyo vimekuja kuunga mkono na kunipokea; huu ndiyo utanzania."
Rais Samia ameeleza kuwa taifa limejengwa katika awamu tofauti na kwa sasa sisi sote tunatakiwa kuungana na kulijenga taifa kwa matofali na nondo imara ili Tanzania isimame. Rais Samia amesema "Kuzungumza kwenye taasisi kama ile (Umoja wa Mataifa) ni jambo jema na la pili ni utekelezaji wa yale tuliyoyazungumza. Niwaombe sana watanzania wote tuungane, tushirikiane, tufanye kazi pamoja kujenga taifa letu (Tanzania). Taifa (Tanzania) ambalo kwa miaka 60 sasa limekuwa likijengwa kwa awamu na hatua mbalimbali. Kila awamu imekuwa ikiweka matofali katika kujenga taifa letu; niwaombe kwa umoja wetu, mshikamano na upendo tujenge kwa matofali na nondo madhubuti ili tuweze kulisimamisha vyema taifa letu."
Rais Samia amesema Tanzania tulipata fursa ya kusema na ulimwengu ikiwa imewakilishwa na Mkuu wa nchi (Rais) baada ya miaka 6 na dunia imeelezwa kuwa Tanzania imara na itafanya kazi na dunia. Rais Samia amesema "Tumekwenda kwenye safari (Umoja wa Mataifa); safari ambayo kwa miaka sita tumekuwa tukiwakilishwa na ngazi ya uwaziri na ubalozi lakini hatukwenda kama kiongozi wa nchi (Rais wa JMT). Mara hii tumeweza, tumekwenda, tumeshiriki na dunia inawasalimia."
Pia akaongeza "Safari yetu tulipokelewa kwenye Umoja wa Mataifa na kusimama kwetu kama Tanzania na kuzungumza tuliwahakikishia ulimwengu na Umoja wa Mataifa kwamba Tanzania tupo na tupo imara na tutaendelea kufanya kazi na dunia."
Rais Samia ameeleza kuwa katika safari hii kuna mambo mengi yamefanyika yenye manufaa kwa nchi yetu ikiwemo diplomasia, uwekezaji, mazingira, UVIKO-19 sambamba na kukutana na viongozi mbalimbali wa nchi na taasisi za kimataifa. Rais Samia amesema "Katika mkutano ule (Umoja wa Mataifa) tulikuwa na mambo manne makubwa; masuala ya uchumi kwa ujumla, masuala ya UVIKO-19, utawala bora na mambo ya mazingira. Kwa niaba yenu niliiahidi dunia na Umoja wa Mataifa kwamba Tanzania tutayafanyia kazi yote haya ili nasi twende na dunia inavyokwenda."
Pia ameeleza "Tulipata fursa ya kuonana na watu mbalimbali; nilionana na Rais wa Benki ya Dunia, Rais wa Baraza la Umoja wa Ulaya, Mtendaji Mkuu wa Taasisi ya Biashara Duniani, wafanyabiashara wa Marekani waliowekeza na wanaotaka kuja Tanzania, Marais kadhaa lakini orodha ilikuwa ndefu wengine nilimwachia Waziri wa Mambo ya Nje anisaidie kuwaona. Kwa ujumla Tanzania tuliombwa kuonana na watu wengi sana ambao wote wangependa kufanya kazi na sisi."
Kazi Iendelee
View attachment 1952410
View attachment 1952416View attachment 1952417